ANKA-DER’î serrgêra awankerdena komeleya xo Kumunê Ziwan ê Ciwanan ke sinife, kitabxane û studyoyêk ra ware yena akerd.
Komeleya Ziwan Kultur û Hunerî ya Ankaye (ANKA-DER), serrgêra 4. ya awankerdena xo de bi bernameyêk Komunê Ziwan ê Ciwanan ke sinif û kitabxane ra ware yena, akerd. Endasm û temsîlkarê sazgehanê demokratîk, Hemserekê Partîya DEM’î yê Anqara Fatîn Kanat û xeylî kesî beşdarê bername bîyî. Komunê Ziwan ê Ciwanan de fotografê kesanê namdaran ê ke seba ziwanî kede dayê ca girewt.
Hemsereka ANKA-DER’î Ferîde Akturan merasîmê akerdişî de qisey kerd û venga ciwanan da ke wa bêrê tîya de ziwanê xo aver berê.
‘Mîrasê KURDÎ-DER’î dewam keno’
Hemserekê KURDÎ-DER’î ke bi KHK’yî amebi girewtene, Mustafa Karamanî zî îfade kerd ke ANKA-DER’î ewro mîrasê KURDÎ-DER’î girewto mile xo ser û vat: “Ma tîya de xebatanê banderbîyayîşê ziwanê Kurdkî kenê. Seba ke ziwanê ma aver şêro xebatê ma dewam kenê. La seba ke ziwanê Kurdkî aver şêro ganî Kurdkî bibo ziwanê perwerdeyî.”
‘Ê çiqas bixeripnê ma hende awan kenê’
Mamostayê ANKA-DER’î Dogan Şensesî zî bale ante Prosesê Aştî û Komelo Demokratîk ser ke bi vendayîşê Rayberê Şarê Kurdî Abdullah Ocalan amebidest pêkerdene û vat: “Ma na çarçewaye de Komunê Ziwan ê Ciwanan awan kerd. Bi amancê averberdişê ziwanê Kurdkî m ana komüne awan kerd. Seke Bavê Teyar vato; ‘Qalinê welatî ercan nîyo la ma zî qasê xo estê. Ê çiqas bixeripnê ma zî hende awan kenê’. Ciwanan seba ke tîya abo kedêka girde dayê. Ma seba keda înan înan rê spas kenê.”
Badê qiseykerdişî Komunê Ziwan ê Ciwanan bi sloganê “Bê ziwan ciwîyayîş nêbeno” ame akerdene.
