Xebatkarê Weşanxaneyê Nûbiharî Azîz Tekînî derheqê weşanxaneyî de dîyar kerd ke Nûbiharî heta ewro nêzdîyê 600 kitabî çap kerdê û vat: “Roja Roşanê Ziwanê Kurdkî merdiman seba ziwan hişyar keno. Ganî ma seba statuya ziwanê kurdkî zî bixebitîyê û heme rojanê xo bikerê 15ê Gulane.”
Weşanxaneyê Nûbiharî serra 1992 ra nat seba ziwanê kurdkî weşangerî keno. Weşanxaneyî heta ewro nêzdîyê 600 kitabî kurdkî çap kerdê û xeylê romanê klasîkî zî açarnayîşê kurdkî kerdê. Xebatkarê weşanxanêyê Nûbiharî Azîz Tekîn derheqê xebatanê Weşanxaneyê Nûbiharî û 15ê Gulane Roja Roşanê Ziwanê Kurdkî Ajansê ma rê qisey kerd.
‘Heta ewro nêzdîyê 600 kitabê Nûbiharî ameyê çapkerdene’
Azîz Tekîn dîyar kerd ke Weşanxaneyê Nûbiharî serra 1992 ra nat weşangerîya kurdkî keno û wina qisey kerd: “Sere de sey Kovara Nûbiharî dest bi kar kerd. Dima ra zî sey weşanxaneyî zî dewam kerd. Kovara Nûbiharî hema zî dewam kena. Nika hûmara 175. yena hedrekerdene. Heta ewro nêzdîyê 600 kitabê Nûbiharî ameyê çapkerdene. Serra 2024î de nêzdîyê 60 kitab, 2025 de zî nêzdîyê 40 kitabî Weşanxaneyê Nûbiharî de ameyê çapkerdene. Emser zî nêzdîyê 50 kitabî do bêrê çapkerdene. Nûbihar xeylê kategorîyan de kitaban çap kena. Kategorîya tewr yena zanayene klasîkê kurdkî û açarnayîşê klasîkê dinya yê. Kitabê ziwananê xeribî, kitabê gedeyan ma açarnayê kurdkî. Weşanxane de nêzdîyê 40 kitabê gedeyan est ê. Kitabê seba gedeyanê 3 serreyan û corêrî est ê. Seta dilşah est a, ziwanê Almankî ra ma açarnayê hem kurmancî hem zî Kirmanckî. Gedeyî muhîmê, ganî kitabê ke balê gedeyan ancenê bibê ke bi rehetî bi musê.”
‘Tedayê serê Nûbiharî tedayê serê ziwanê kurdkî yê’
Azîz Tekîn dîyar kerd ke serranê 1990î de sey her sazgehanê binan serê Nûbiharî de zî teda bîbî û wina dewam kerd: “Tedayê serê Nûbiharî tedayê serê ziwanê kurdkî yê. Her kes serranê 90î zano, tedayî zaf bîbî. Nûbihar zî sey weşanxaneyê binan yê kurdan, seba cewabdayîşî vejîya vernî. Weşangerîya kurdkî, seba hewceyîya ziwanê kurdkî bi nê şîarî vejîya.”
‘Ganî ma zafêrî seba statuya ziwanê kurdkî bixebitîyê’
Azîz Tekîn vist vîr ke rewşa ziwanê kurdkî ewro girêdayê statuya û vat: “Bê statubîyayîş ziwanê kurdkî aver nêbeno. Helbet do xebate dewam bikero, statu çin bo zî ma fek xebate ra veranêdanê. Her kes seba ziwanê kurdkî hişyar o, seba ziwanê kurdkî têkoşîn dano. Nûbihar zî warê wendiş û weşanayîşê materyalan de seba resnayîşê wendekaran xebitîyeno. Ganî ma xebatanê xo yê serê ziwanê kurdkî dewam bikerê û seba statuya ziwanê kurdkî zî bixebitîyê.”
‘Verê zêdeyêr kitabê kurdkî ameyene wendene’
Azîz Tekîn ard ziwan ke eleqeyê seba kitabanê kurdkî goreyê çimeyan verê ra başêr o û qiseykerdişê xo wina domna: “Stenbol de xeylê kurdî ciwîyenê, wendekarê kurdî zî xeylîyêkê yê. Verê zêdeyêr kitabê kurdkî ameyene wendene. Ewro rewşa şerê psîkolojîk, şerê Rojava û Rojhelat û dorûverê Kurdîstanî nêwazê zî hetê wendişî ra psîkolojîya wendekaran apey beno. La reyna zî eleqeyêko baş est o, şîyayîş û ameyîş beno. Kitabê ke newe vejîyenê yenê merakkerdene. Heta ke destê ma ra yeno ma wazenê kitaban ercan bidê. Wext wext ma kampanyaya ercanî virazenê. Kitabê ‘Mehmet Emîn Zekî Beg, Kurtler ve Kurdîstan’ çapê xo yê 20. kerd. Tewr tay 20 hezar ameyo rotene. Bi munasebetê çapê 20. Ma %50 vist. Tewr zêde kitabê Şerefname û kitabê cigêrayîşî ya Tarîxê Kurdîstanî yenê rotene. “
Têkoşînê seba ziwanê kurdkî
Azîz Tekîn da zanayene ke Roja Roşanê Ziwanê Kurdkî seba motîvekerdişê raya pêroyî zaf baş a û qiseykerdişê xo wina qedêna: “Roja Roşanê Ziwanê Kurdkî mabênê merdiman de derheqê ziwanî de hişyarî virazena. La ganî merdim tena bi na rojê sînordar nêmano. Ganî ma heme rojanê xo bikerê 15ê Gulane. Seba ziwanê xo têkoşîn bidê. Sey weşanxaneyêke çîyêko bikewo serê milê ma ganî ma zêdeyêr baldarî bê.”
