Sazgehanê Ziwanê Kurdkî û Platformê Sazgehanê Demokratîkan, bi munasebetê 15ê Gulane Roşanê Ziwanê Kurdkî, binê sernameyê “Kirmanckî û Edebîyat”î de panelêk viraşt.
Sazgehanê Ziwanê Kurdkî û Platformê Sazgehanê Demokratîkan, bi munasebetê 15ê Gulane Roşanê Ziwanê Kurdkî, panelêk viraşt. Panel binê sernameyê “Kirmanckî û Edebîyat”î de Parqê Eyşeşanî, Komela seba Ameyoxê Ma Îtiya yê (GİBDER) de ame viraştene.
Xêlê mehmanî û kesê ke warê ziwan û edebîyatî de xebat kenê, ameyî têhet. Cemîle Turhalli Balsake û Mihemed Kurdî bi zanayîşê xo yê serê edebîyatê kirdkî panel de ca girewt. Ozlem Barane zî moderatorîya panelî kerde. Sazgehê Ziwanê Kurdkî bi nê fealîyetî wazenê ke hem Roşanê Ziwanê Kurdkî fîraz bikerê hem zî bala şarî biancê serê edebîyat û ziwanê dayîke. Heme hezkerdoxê ziwanî beşdarê nê panelî bîyî.
Edebîyatê fekî
Cemîle Turhalli Balsake derheqê edebîyatê fekî de qisey kerd û wina vat: “Waxto ke edebîyat virazîyo cuya kurdan û ermenîyan pîya mîyanê yewbinî de bîya. Zaf kesê ermenî kurmancî û kirmanckî zanyayêne. Edebîyatê fekî vîrê kollektifî nîşan dano. Hîsê komelî îfade keno. Nuşte çîrê muhîm o? Nuşte her çî qeyd keno. Ma bawerîya êzidîyan ser bifikirîm. Şima zanê dînê êzidîyan cîya yo. Mi yew kitabê înan wend, nameyê ci Mishefo Reş o. Seba nê kitabî vanê belkî 2-3 henzar serrî naye ra ver ame nuştene. Timî timî mabênê xo de nuşteyê ke nê kitabî de vêrdê ra ser qisey kerdo û vîra xo ra nêkerdo. La hama newe ameyo nuştiş.”
‘Ma eşkenê pê hişyarîyêka netewîye ziwanê xo destê asîmîlasyonî ra xelas bikerê’
Mihemed Kurdî zî bale ante polîtîkayanê dewlete yê asîmîlasyonî ser û wina vat: “Polîtîkaya asîmîlasyonî zaf şaristananê vakurê Kurdistanî de resaya asta serkewtişî. Ewro endî zafê şarê ma ziwanê xo nêzaneno, ziwanê xo de qisey nêkeno. 10-15 serrî naye ra ver ma ciwanan û embazan ra pers kerdêne, ma vatêne, ‘şima kurmancî ya zî zazakî qisey kenê yan nê?’ Înan vatêne ‘Ez fam kena la ez nêeşkena qisey bikerî.’ Çi heyfo ke nê çend serranê peyênan de kesê ke Amed de bîyî pîl, endî kurdkî fam zî nêkenê, nêzanenê qisey zî bikerê. Ma çi qeyde eşkenê ziwanê xo bipawê? Ma teyna eşkenê pê hişyarîyêka netewîye ziwanê xo destê asîmîlasyonî ra xelas bikerê.”
