Dayikê Şemeyî hewteyo 1014. de aqûbetê Pîro Ay o ke 15ê gulane serra 1994 de amebî destbendkerdiş û vîndîkerdene, persayê. Endama Heyetê Îmralîyî Pervîn Buldan çalakî de dîyar kerd ke ey wazenê yewîneyê Wezaretê Edaletî awan kerdo bi babeta vîndîbîyayan ra meşgul bibe û vat: “Eke vîndîyêk bibo faîl zî est o.”
Merdim û Dayikê Şemeyî bi waştişê “Vîndî bêrê vînayene, kiştoxî bêrê muhakeme kerdene” hewteyo 1104. de Meydanê Galatasaray de çalakîya xo yê hewtena viraşte. Dayîkê Şemeyî, merdimê vîndîbîyayan, endam û rayberê ÎHD’yê Stenbolî, endamê Heyetê Îmralîyî yê DEM Partî Mîthat Sancar û Pervîn Buldan, Hemserekê DEM Partî yê Stenbolî Çinar Altan û xeylê pawitoxê heqanê merdiman tewrê çalakî bîyê. Çalakî de fotografê vîndîbîyayan ameyê berzkerdene.
Hewteyê 1014. de Dayîkê Şemeyî aqûbetê Pîro Ay o ke 15ê gulane serra 1994 de amebî vîndîkerdene, persayê. Eşkerayî hetê Merdimanê Şemeyî Jiyan Kaya ra ameya wendene.
‘Tu agahî Pîro Ay ra nêameya girewtene’
Jiyan Kaya dîyar kerd ke her kes seba roşanêk bînî bi heyecan ê la ey seba aqûbetê kesê ke ameyê vîndîkerdene û faîlî înan bêrê muhakeme kerdene û wina vat: “Çiqas îqtîdarî vurîyayê zî la polîtîkayê bêceza verdayene her wext dewam kerd. Ma hewteya 1104.de seba Pîro Ay tîya de yê. 15ê gulane serra 1994 de qezaya Dêrike de leşkeran dest bi operasyon kerd. Pîro Ay û dewijê ey bi nameyê A.D. bi maneyê ‘hetkarî daye PKK’yî ameyê destbendkerdene. Badê hedîse keyeyê Pîro Ay seba aqûbetê ey bizano newal û koyan de ro ey gêrayê û verê çemêke de şopê goninî vînayê. Badê aye ra tu agahî Pîro Ay ra nêameya girewtene. Pîyê Pîro Ay Bedir ay bilez şî qereqola Uçyolî, Fermandarîya Cendermeyan a Dêrike û dozgerîya Dêrike tewlî heme hewldanan û muracatan zî eynî cewab ame dayene; ‘Pîro Ay nêameyo destbendkerdene’.”
‘Polîtîkaya bêceza verdayişî’
Jiyan Kaya dîyar kerd ke serê hedîse ra 18 serrî derbas bî bi hewldayîşê ÎHD’yê Mêrdînî cigêrayîş ame dest pêkerdene û vat: “Serdozgerîya Komare ya Mêrdînî 6 hedîseyanê cîyayan de îdianame amade kerd. 16ê temuze 2012 de bi vatena ‘guman bibo û çin bo zî bi kêfî xeylê kesî ameyê kiştene, no ameyo tespîtkerdene ‘ îdianame de ca girewt. Ê demî de Musa Çîtîl sey Fermandarê Cendermeyan ê qezaya Dêrike de wezîfedar bî. Bi qebulkerdişê îdianameyê ke derheqê Musa Çîtîl de dewa ameye akerdene. La dewa de polîtîkaya bêcezaverdayîş kewt dewre û Musa Çîtîl berat kerd. Heqê ma est o ke ma rastî bizanê. Kesê ke verê çimanê keyeyê ey de; Pîro Ay destbend kerdbî kamî bî ? Çi ame sereyê Pîro Ay? Çend serrî derbas bibê ma do aqûbetê kesanê vîndîbîyayan pers bikerê.
Pervîn Buldan: Seba aştîya bi rûmete ganî faîl bêrê vînayene
Pervîn Bûldan qiseykerd û ard ziwan ke têkoşînê înan do dewam bikero û wina dewam kerd: “Wezaretê Edaletî yewîneyêke awan kerda. Ma zî wazenê o yewîne dest bido ma û dejanê ma bivîno. Ma vanê eke vîndîyayêk bibo faîl zî est o. Eke aştî bi ca bêro ganî faîlî zî bêrê vînayene ke aştîyêka bi rûmete virazîyo.”
Çalakî bi ronayîşê qerenfîlan yê Meydanê Galatasaray ra dima qedîya.
