Hemserekê DEM Partî yê Pêroyî Tuncer Bakirhanî Amed de “Kombîyayîşê Aştîya Komelkî û Azadîye” de qisey kerd. Kombîyayîşî de ke parlamenterî, hemşaredarî, rayberê DBP’yî, aktîvîstê TJA’yî, Mayê Aştî û bi seyan şar beşdar bîyî, Bakirhanî derheqê prosesê muzakereyan û peyamê Rayberê PKK’yî Abdullah Ocalanî de fikrê xo vatî.
Bakirhanî qiseykerdişê xo de dîyar kerd ke rayîrê çareserîye û aştîye Amed û Anqera ra vîyareno û Ocalan seba vengdayîşêko tarîxî xo amade keno. Ey va ke ganî tecrîd bêro wedarnayene û Ocalan şarî reyde bêro têhet. Proseso ke ewro virazîyeno Rojawan, Kobanî û Qamişlo zî eleqedar keno û dewlete eke wazena no proses bibo prosesê çareserîye, ganî zîhnîyetê qeyûmî red bikero.
Xoverdayîş û kulturê Amedî
Tuncer Bakirhan behsê xoverdayîş û zafrengîya Amedî kerd û wina vat: “Amed şaristanê xoverdayîş, kultur, ziwan û bawerîye yo. Amed her tim sey verê gandar û linganê xo ser o yo. Ma ewro Amed de yê, ma seba Aştîya Komelkî û Azadîye şarê xo reyde kom benê. Ma heme şaristan û qezayan de nê kombîyayîşan ronenê.”
Qiseykerdişê hîra yê Tuncer Bakirhanî wina yo:
“Birêz Ocalan pêvînayîşî de çîyêko zaf muhîm vano. Vano ke ‘Wayîrê nê meseleyê şarê ma yo. O ke raşt o şarê ma yo û heme çî girêdayeyê ey o. Şarê reyde qisey bikerê û nîqaş bikerê. Fikir, ewnîyayîş û peşnîyazanê şarî mi rê bîyarê.’ Ma zî ewil şaristananê Kurdîstanî de û dima ra heme şaristananê Tirkîya de ma do nê kombîyayîşan ronê û ma do hewl bidê ke heyet fikranê şarî Ocalanî rê bibê.”
‘Rayîrê vengdayîşê tarîxî Amed û Anqera ra vîyareno”
“Rayberê nê welatî sey ma nê şaristanî muhîm vînenê. Ge ge vanê rayîrê aştî Amed ra vîyareno. Tayî vejîyenê vanê rayîrê Yewîya Ewropa Amed ra vîyareno. Ma zî reyna vanê rayîrê çareserî û aştî Amed û Anqara ra vîyareno. Ma Anqara zî ronê kişta Amedî. Amed û Anqara merkezî nîqaşanê çareserîya demokratîk ê meseleyê kurdî yê. Problemêkê pîl yê Tirkîya Meseleyê Kurdî yo. Ma prosesêko winasînî ra vîyarenê ke nîqaşê çareserîya demokratîk ê meseleyê kurdî yenê kerdene. Vizêrî vatêne kurd çin ê la ewro rastîya şarê kurd yena qiseykerdene.
Tirkîya nîqaşanê zaf cîdîyan kena. Ma wazenê nê nîqaşî û proses bibo prosesê çareserî û aştîyêka bi rûmet. Em wayîrê meseleyê çareserîye û aştî vejîyenê. Ma bi prosesêko muhîm reyde rî bi rî yê. Ma dewranê tewr zehmetan de ameyê têhet û ma şarê xo reyde qisey kerd. Eke şar tewrê nê têkoşînî nêbo, no têkoşîn sernêkeweno.”
Heqanê şarê kurd bişinasnê
“Eke no problem bêro çareserkerdene ganî kurdî bi heqanê xo bêrê şinasneyene. Ganî ziwanê înan bêro şinasnayene û bibo ziwanê perwerdeyî. Ganî qeyûm nêrê tayînkerdene. Ganî no ferasetê zilmî biqedîyo.”
Vengdayîşê tarîxî yê Ocalanî
“Beno ke vengdayîşêk bêro kerdene. Birêz Ocalan xo seba vengdayîşêko tarîxî amade keno. Birêz Ocalan derheqê çareserîya demokratîk a meseleyê kurdî de beyanatêko tarixî bido.”
Ma vanê aştî ê zilm kenê
“Ma vanê no prosesêko muhîm o ke qewimîyeno la ê qeyûm tayînê Şaredarîya Sêrtî kenê. Ê zilm kenê.”
‘Ma zelal ê’
Bakirhanî qiseykerdişê xo de dîyar kerd ke hetê înan ra aştî zaf zelal a û ê venga îqtîdarî danê ke seba prosesî gaman bierzo. Ey wina vat: “Eke Ocalan şarî reyde bêro têhet, proses do hîna aver şêro. Ti nêeşkenê bi tecrîd û îzolekerdişî prosesê muzakereyan biramne.”
Kombîyayîş ke çapemenî ra dima zî dewam kerd de DEM Partî û heme ê beşdarî seba prosesê çareserîye fikrê xo pêşkêş kerdî.
