Welatijo bi nameyê Muhsîn Demîr rixmê ke nêeşkeno qisey bikero û bieşnawo, serran o mîyanê têkoşînî de yo. Rayberê DEM Partî yê qezaya Esenyurtî Huseyîn Atbaşî qala têkoşînî Muhsîn Demîrî kerd û vat: “Ez 8 serrî ke embaz Muhsîn Demîrî nas kena. Embaz Muhsîn her tim yeno tîya. Verê ke veng ey bêro dayîş, o grûbe teqîb keno û beşdarê çalakîyan beno. Girêdayîş û cidîyetê ey her kesî xurtêr o.”
Muhsîn Demir 62 serre yo, qezaya Qereyazî ya Erziromî ra yo û pîyê 8 gedeyan o. Ey Têgêrayîşê Azadîya Kurdîstanî bi MED TV’î nas kerdo. Gedeyîya xo de badê ke kewto awe û nêweşîya menenjîtî derbas kerdo, hendî nêeşkeno qisey bikero û bieşnawo. Muhsîn Demir serra 2012î de bi keye xo reyde koçê Stenbolî kerd û qezaya Esenyurtî de bi ca bi. Bi no halê xo, roja ke Esneyurtî de bi ca bîyo ra nat kar û xebetanê partî û têgêrayîşî ra dûrî nêkewto.
Muhsîn Demîr
‘Raverşîyayîşan teqîb keno û çalak o’
Muhsîn Demîr her roje şino awanîya DEM Partî ya Esenyurtî û goreyê şert û mercanê xo beşdarê xebatan beno. Raverşîyayîşan teqîb keno, tewrê nîqaş, çalakî û eşkerayîyan beno. Esenyurtî de bi têkoşîn û helwesta xo yeno naskerdene û rêz ey rê yeno girewtene.
Rayberê DEM Partî yê qezaya Esensyurtî Huseyîn Atbaşî derheqê tecrubeyanê Muhsîn Demîr de ajansê ma rê qisey kerd.
‘Her roje serê sibayî yeno tîya’
Huseyîn Atbaş diyar kerd ke o 14 serrîyo ke Esenyurtî de ciwîyeno û rayberîya DEM Partî ya qezaya Esenyurtî de ca gêno û wina behsê Muhsîn Demîr kerd: “Ez 8 serrî yo ke embaz Muhsîn Demîrî nas kena. Embaz Muhsîn Demîr her roje serê sibayî yeno tîya. Keyeyêko welatperwerî ra yo. Wexto ke mi embaz Muhsîn nas kerd, girêdayîş û timûtimîya ey xeylî bala mi ant.”
‘Girêdayîş û cidîyetê ey her kesî xurtêr o’
Huseyîn Atbaş îfade kerd ke Muhsîn Demîr serran o xeylî kesan rê bîyo nimune û wina qiseyê xo qedêna: “Eşnawitiş û qiseykerdişê ey çin o, la embaz Muhsîn Demîr bi hîskerdişê xo têgêreno. Her roje ma taqîb keno, eke çalakîyêk bibo o zî ma reyde yeno. Verê ke yew venga ey bido, grûbe teqîb keno û beşdarê çalakîyan beno. Tayê embazî vanê ‘Ma nêşêrê zî embaz Muhsîn şino heme çalakîyan.’ Girêdayîş û cidîyetê ey xeylî xurt o. Her roje xo aver beno, televîzyonî temaşe keno, rojnameyî waneno. Eke mîyanê embazan de hêrsbîyayîş bibo, o keweno maben û embazan pê ano.”
