YNKyî qerarê gîrewtişî yê rojnameger Ehmed Necîm û Bîjar Debaxî ser o eşkerayîyêka fermî daye û veng da Sendîkaya Rojnamegeranê Kurdîstanî û dezgehanê komelkî yê sivîlan ke vera nê qerarî bêveng nêmanê.
Komîteya Çapemenî ya YNK’yî, qerarê Wezîrê Karanê Zereyî yê Hukmatê Herêma Kurdîstanî yo ke seba girewtişê rojnameger Ehmed Necîm û Bîjar Debaxî amebi dayene ser o wina vat: “Qerarê Wezîrê Karanê Zereyî qerarêko hizbî yo, hukmî nîyo. No qerarêko winasîn o ke azadîya çapemenîye sînordar keno. Ma Sendîkaya Rojnamegeranê Kurdîstanî û rêxistinanê komelkî yê sivîlan ra wazenê ke vera nê qerarî bêveng nêmanê.”
Fermanê gîrewtişê Channel 8’î
Goreyê nuşteyêko fermî yê Wezaretê Karanê Zereyî yê Hukmatê Herêma Kurdîstanî ke roja 7ê gulana 2026î de bi îmzaya Wezîrê Karanê Zereyî Rêber Ehmedî amebi vetene, fermanê girewtişî seba Serekê Heyetê Rayberîya Channel 8’î Ehmed Necîm û pêşkêşkarê kanalî Bîjar Debaxî amebi dayene. Vizêr no qerar raya pêroyî rê ame eşkerakerdene û ney ser o Komîteya Çapemenî ya YNK’yî eşkerayîyêk vila kerd.
Eşkerayî de Heyetê YNK’yî fikarê xo yê nê qerarî ser o mojna û vat: “Qerarê girewtişî yê rayber û medyakarekî dîyar ê Channel 8’î, qerarêko hizbî yo û azadîya çapemenî sînordar keno.”
No qerar vera qanûnê rojnamegerî yê serra 2007î yo
Dewamê eşkerayî de wina ame vatene: “No qerar vera qanûnê hûmar 35 ê serra 2007î yê karê rojnamegerî yê Herêma Kurdîstanî yo. Eynê wextî de vera pîvananê sendîkaya rojnamegeranê Kurdîstanî yo. Goreyê qanûnî, nêbeno ke bêyî temsîlkarê sendîkayî seba îfadegirewtişî zî venga rojnamegerî bêro kerdene; nêke qerarê gîrewtişî seba ci bêro vetene.
YNK qeraranê winasînan sey rayîrêko newe yê seba bêvengkerdişê pêro rojnamegeran vîneno. Nê rojnamegerê ke serê dosyayanê rîşwet û kêmanîyan xeber, rapor û zanayîşan vila kenî. No qerarê Wezîrê Karanê Zereyî, nasnêkerdişê qanûn û pîvananê rojnamegerîye yê Kurdîstanî, mehkemayan û Wezaretê Rewşenbîrî yê Herêma Kurdîstanî yo. No hîna zaf qerarêko hizbî yo, hukmî nîyo.”
Tewr peyên Komîteya Çapemenî ya YNK’yî veng da Sendîkaya Rojnamegeranê Kurdîstanî û rêxistinanê komelkî yê sivîlan ke vera qerarî vinderî û vernîya caardişê qerarî bigîrê.
