Verê vengdayîşê Rayberê PKK’yî Abdullah Ocalanî beyanat ame dayene û beyanat de heme şar dawetê Warê Şêx Seîdî ame kerdene.
TJA, DBP û DEM Partî verê vengdayîşê Rayberê PKK’yî Abdullah Ocalanî awanîya Rêxistinê Şaristanî Amedî yê DEM Partî de beyanat danê.
Beyanat de Hemserekê DBP’yî yê Amedî Mehmet Şîrîn Gurbuz qisey kerd û va ke ewro do Warê Şêx Seîdî de beyanato tarîxî bêro dayene û wina va: “Ewro do heyetêk Rêzdar Ocalanî reyde pêvînayîşêko tarîxî bikero û pêvînayîşî ra pey do beyanato tarîxî bêro dayene. Seba hetê nê beyanatî de vindertiş ser o heme şarê ma yê Kurdistanî rê vengdayîşêkê ma yo; ma sey kurdan vatîşê Birêz Ocalanî esas gênê, no ser vengdayîşo ewroyin seba ma zaf manadar o. Bi serrano ke bi polîtîkayê tecrîd û asîmîlasyonî waştî îradeya şarêkî çin bikerî la ewro ma dî ke tecrîd veng vejîya û şaran rê zî feydeyê ci çin o.”
Ma Warê Şêx Seîdî de bêrê têhet
Mehmet Şîrîn Gurbuz ard ziwan ke helbet eşkerayîyek bêra dayene, fikr û vatişê Birêz Ocalanî heme dinya ra do bêro hesyayîş û wina dewam kerd: “Her şert û mercî de îradeyêko aştî û pîyacuyayîşî ra dûr nêvindert, no îrade qet tepa game zî nêeşt û ma zî na îrade ewte ra silam kenê. Şarê kurd û şarê Kurdîstanî ra vengdayîşê ma yo; ma ewro saet: 16.00î de do Warê Şêx Seîdî de bêrê têhet û ma do vengdayîşê Birêz Ocalanî heme pîya goşdarî bikerê. No vengdayîşî ra pey do rayîrêko werte ra pîya bimeşî. Ma bi serrano ke vanê ke feydeyê polîtîkayê lêşînî şarê Tirkîya rê çin o. Hewna vejîya werte ke doz û dewaya şarê kurdî meşrû ya, şarê kurd do her tim hetê nexşereya newe de ca bibo. Ma nika ra pey do seba azadîya Birêz Ocalanî bêrê têhet û ma hewna vendayîşê xo şarê xo rê newe kenê û ma Warê Şêx Seîdî bêrê têhet û ma bimojnê ke vengdayîşê Birêz Ocalanî senî şarê kurd wayîr vejîyeno, ez silam û hûrmetê xo pêşkêş keno.”
Ma do aştî, aramî û azadî biqîrê
Hemsereka DEM Partî ya Amedî Gulşen Ozer zî dîyar kerd ke heme dinya mesajê Birêz Ocalanî pawena û wina domna: “Ewro seba aştî û aramî heme şarê Kurdîstanî û şarê Amedî wazenê; bi no mesajdayîşî tecrîd vila vejîya, dewaya heqdar a û ma zî peynîya dewa ya xo yê. Fikr û ramanê Birêz Ocalanî çiqas heqdar ê û ma veng danê wa şarê ma bêro û no mesaj zî cayê xo bivîno. Ma hewna vengdayîşê xo şarê xo rê newe kenê û ma vanê ; ma do Warê Şêx Seîdî bêrê têhet û aştî, aramî û azadî biqîrê.”
