Rojnameger Ciwana Cuma ke Awbendê Tişrînî de xebran taqîb kena, ard ziwan ke tewrê hêrîşan heme şarê Vakur û Rojhelatê Surîye verê xo dano Awbendê Tişrînî û va: “No vindertiş û xoverdayîş do rîpelanê neweyan tarîxî de akero.”
Tirkîya û grûbanê paramîlîterê ke girêdayeyê aye yê aşma kanûna 2024î ra nat hêrîşanê xo yê herêmanê Vakur û Rojhelatê Surîye ser o domnenê. Hêrişê Tirkîya û grûbanê paramîlîteran yê Awbendê Tişrînî ser o ke aşma kanûne de dest pêkerdbî, dewam kenê. Vera hêrîşan Hêzê Sûrîya Demokratîke (HSD), Yewîneyê Pawitişê Cinîyan (YPJ) û Yewîneyê Pawitişê Şarî (YPG) herême pawenê û cewabê hêrîşan danê. Şarê Vakur û Rojhelatê Surîye zî vera hêrîşan 8ê çele de Awbendê Tişrînî ser o dest bi çalakîya nobete kerdbi. Çalakîya welatîjan a Awbendê Tişrînî ser o tewrê hêrîşan 50 rojî yo ke dewam kena. Netîceyê hêrîşanê welatijanê sivîlan ser o rojnameger, hunermend û sîyasetmedarî zî tede zaf welatijan cuya xo vîndî kerde û bi seyan welatî zî birîndar bîyî.
Rojnameger Ciwana Cuma ke roja verêne ra heta ewro Awbendê Tişrînî de xeberan taqîb kena, çalakîya şarî ya awbendê ser o, kiştişê rojnamegeran û rewşa herême Ajansê Welatî (AW) rê analîz kerdê.
‘Vatişî seba xoverdayîşê Awbendê Tişrînî qêm nêkenê’
Rojnameger Ciwana Cuma ard ziwan ke şaro 7 serrîyan ra heta 70 serrîyan verê xo dano Awbendê Tişrînî û wina va: “8ê çeleyî ra nat şaristan bi şaristan, dewe bi dewe heme şarê Vakur û Rojhelatê Sûrîye verê xo dano Awbendê Tişrînî. Awbendê Tişrînî bîyo Awbendê xoverdayîş û Awbendê şehîdan. Tewrê hêrîşan zî welatijê Vakur û Rojhelatê Sûrîye bê ters verê xo danê Awbendî. Welatijî vera hêrîşanê Tirkîya û grûbê çeteyan ke girêdayeyê ci yê, Awbenda Tişrînî ser o nobet gênê. Şar bi ruhê şerê şarê şoreşgerî tîya de nobet gêno û Awbendî rê wayîrêne vejîyeno. Xoverdayîş û vindertişê şarî tewrê heme tewirê hêrîşan zî dewam keno. No vindertiş û xoverdayîş do rîpelan neweyan mîyanê rîpelanê tarîxî de akero. Vatiş û qiseykerdiş seba xoverdayîşê şarî qêm nêkenê ke merdim behs bikero. Domanê 7 serrîyan ra heta welatîyê 70 serrîyan verê xo danê Awbendî. Tayê keyeyî bi domanê xo yê şenikî reyde yenê Awbendî ser o û nobet gênê.”
‘Hîrê hetan ra hêrîş kenê’
Ciwana Cuma dîyar kerd ke Tirkîya û grûbê paramîlîterî hîrê hetan ra hêrîşê Vakur û Rojhelatê Surîye kenê û wina dewam kerd: “Dewleta Tirk rojane her hetî ra Awbendî bombarduman kena û welatijanê sivîlan qetil kena. Nika Vakur û Rojhelatê Surîye de hîrê hetan ra hêrîş û pawîtiş dewam keno. Înan ra yew Pira Qeraqozak, yew Awbendê Tişrînî yo û a bîne zî Der Hafîr o. Nê her hîrê xetê cepheyê sereke yê xoverdayîşî yê. Nê her hîrê xetan de şer û têkoşînê zehmetî benê. Tirkîya bi ÎHA û SÎHA’yan hewl dana ke hêrîşê Awbendî bikera û Awbendî ra derbaz biba. La HSD, YPJ û YPG rayîr nêdanê hêrîşan û vernîya îşxalkerîye gênê. Hetê Pira Qeraqozak de zî rojane hêrîşê Tirkîya dewam kenê. Tirkîya bi hêrîşan mal û milkê şarê herême zî kena hedef. Peynîya peynî zî dewleta tirke hewl dabi ke derbazê xeta Vakur û Rojhelatê Surîye biba la ê hewldayîşê înan rastê pawitişêko gird ameyî û cewabêko pêt ame dayene. Her wina rojane bi desan çete yenê kiştene. Zafê çeteyan remenê û xeylê çete zî kewtê destê HSD’yî. Senî ke YPJ pêşengîya şerî kena, Awbendê Tişrînî ser o zî dayîk û cinî rayberîya xoverdayîşî kenê.”
‘Egîd Rojî çimanê mi ver şehîd kerd’
Ciwana Cuma bale ante hedefgirewtişê rojnamegeran ser o û ard vîr ke tewr peyên rojnameger Egîd Rojî 15ê sibate de netîceyê hêrîşê SÎHA yê decuya xo vîndî kerdibî û wina qisey kerd: “Hêrîşanê Tirkîya de rojnamegerê ke heqîqete resnenê zî benê hedef. Seba ke rojnamegerî heqîqatan resnenê, Tirkîya aciz bena û hêrîşê rojnamegeran kena. Roja destpêkî de Nazim Daştan û Cîhan Bîlgîn netîceyê hêrîşê SÎHA’yanê dewleta tirke de şehîd bîyî. Tewr peyên zî 15ê sibate de Tirkîya rojnameger Egîd Rojî çimanê mi ver de şehîd kerd. Egîdî heta wextê peyên xoverdayîşê Awbendê Tişrînî taqîb kerdêne. Egîd bi dronanê Tirkîya ame hedefgirewtene û şehîd bi. Bi desan welatijî zî nê hêrîşan de birîndar bîyî. Dewleta tirke wazena vengê rastî û heqîqetî bibirna ke qirkerdiş û hovîtîya ke tîya de kena, bi rehetî şarî ser o bidomna. La ma sey rojnamegerê ke Awbendê Tişrînî ser o yê, vanê, wa Tirkîya weş bizana ke bi hedefgirewtişê embazanê ma yê rojnamegeran, bi şehadetê embazanê ma Egîd Roj, Nazim Daştan û Cîhan Bîlgîn nêşêna hêzê ma bişikna û moralê ma xirab bikera. Eksê ci her şehadetê embazê ma, ma rê beno hêz. Ewro her şehadetê embazê ma, ma rê beno berzkerdişê alaya têkoşîn û xoverdayîşî.”
‘Ma do bi ruhê Nazim, Cîhan û Egîdan biresnê’
Ciwana Cuma reaksîyon nîşanê bêvengîya sazî û dezgeyanê rojnamegerî yê mîyanneteweyîyan da û wina veng da: “Seba ney çi beno wa bibo ma do Awbendê Tişrînî ser o bi ruhê Egîd, Cîhan û Naziman heta wextê peyên bibê vengê şarê xo. Ewro bi kameraya Cîhan, Nazim û Egîdî ma vengê xoverdayîş û rastîye Awbendê Tişrînî ser o resnenê. Ma huyayîşê dayîkan yê ke Awbendî ser o xover danê, dinya rê resnenê. Ma ra tena yew kes zî bimano do xoverdayîşê tîya bireso heme dinya. Ma veng danê sazîyan zî ke vanê ma heqê rojnamegeran pawenê û vanê; şima tu heqê rojnamegeran nêpawitî. Eke şima rojnamegerî bipawitêne, ewro bi desan embazê ma nêbîyêne hedefê hêrîşan. Bêvengîya înan zî bena şirîktîya nê hêrîşanê vera rojnamegeran. Ganî sazîyê ke vanê ma heqê rojnamegeran pawenê, rojnamegeranê Vakur û Rojhelatê Surîye rê wayîr vejîyê û êyê ke embazê ma qetil kerdî bêrê cezakerdiş.”
‘Eke Awbend biteqo do Surîye û Iraqî de felaketêk bibo’
Ciwana Cuma îfade kerd ke talukeyê teqayîşê Awbendê Tişrînî est ê û wina veng da hêzanê mîyanneteweyîyan: “Riyê hêrîşanê Tirkîya û grûbanê çeteyan ke girêdayeyê ci yê, talukeyêko pîle Awbendê Tişrînî ser o est o. Awbend hetê Tirkîya ra yeno bombardumankerdiş. Eke vernîya hêrîşan nêro girewtene do bobelatêko însanî bibo. Seba ney zî vengdayîşê lezgînî yenê kerdene. Eke Awbend biteqo do Surîye û Iraqî de falaketêko pîle bibo. Ganî sazîyê mîyanneteweyî û êyê ke heqê merdiman pawenê têbigêrê. Ganî nê qirkerdiş û hovîtîyan bidê vindarnayene. Heta nika helwestêka cîdî ya dewletanê mîyanneteweyîyan vera hêrîşan çin a. Beyanatê ke yenê dayene hêrîşan ser o tesîr nêkenê. Ganî êdî nê hêrîşî bêrê vindartiş. 50 rojî yo ke şarê herême Awbendî ser o nobet gêno. Nê 50 rojan de 24 welatijî şehîd bîyî û bi seyan welatijî birîndar bîyî. Ganî vernîya qetilkerdişê welatijan bêro girewtene.”
