Hemsereka OHDî ya Îzmîrî Leyla Çelîk derheqê munaqeşeyê destûrê bingeyîn ê newe de ercnayîş kerd û da zanayîş ke ganî cinî tewrê prosesî bibê û dewlete babetê têduştîya cinsî û vernîgirewtişê qirkerdişê cinîyan de berpirsîyarîyê xo ca bîyaro.
Hemsereka Komeleya Huqûqnasê Semedê Azadîye (OHD) ya Îzmîrî Leyla Çelîk derheqê babete de ercnayîş kerd.
‘Ganî fikrê rêxistinê cinîyan bêro girewtiş’
Leyla Çelîk dîyar kerd ke destûrê bingehîn ê bîyaye darbeyê 1982ine yo û no lazimîyê Tirkîya rê cewab nêdano û vat: “Wazenê cinîyan teberê nê prosesî de bigîrê. Cinî destûrêk bingehîn ê demokratîkî, azadîwaz û têduştî wazenê. Nê prosesî de heqê vatişî bidê rêxistinê cinîyan. Ganî destûrêk bingehîn ê têduştîya cinsî yê komelî esas gêno, bêro awankerdiş.”
‘Ganî qetilkerdişê cinîyan sûcê merdimayî bo’
Leyla Çelîk dewam de wina vat: “Sey cinî ma a bawerî de yê ke heqê cinîyan babeta qetilkerdiş û şîdetê cinîyan ser de, bikewo binê asayîşî. Ma garantîyê Destûrê Bingehîn wazenê ke bi hawayêko aktîf nê wezîfeyî ca bîyaro û çimdarî bikero û dem bi dem rêziknameyê newe virazno. Ganî dewlete semedê vernîgirewtişî şîdetê cinî ser tedbîr bigîro. Ganî hemverê her tewir teda û şîdetî de ceza bibo û a gore rêziknameyî bêrê viraştiş.”
‘Ganî sererastkerdişî bêrê kerdiş’
Leyla Çelîk dîyar kerd ke ganî serarastkerdişî bêrê kerdiş û vat: “Ganî meaş û karê têduştî esas bêrê girewtiş. Ganî heqê welidnayîşî û dayîkbîyayîşê cinîyan bikewo binê asayîşî. Ganî hem wareyê îstîmlakî de hem zî sektorê taybetî de kreş û xizmetê ewnîyayîşî bêrê zêdekerdiş. Bi zêdekerdişê nînan sererastkerdişî cinî eşkenê zêdeyêr cuya xebate de ca bigîrê.”
‘Ganî temsîlkarîya têduştî bikerê binê asayîşî’
Leyla Çelîk tewr peyîn wina vat: “Semedo ke cinî aktîf tewrê cuya siyasî bibê, ganî sererastkerdişî bêrê kerdiş, bêrê teşwîqkerdiş. Eynî wextî de asayîşê destûrê bingehîn ê heqê rêxistinbîyayîşê cinîyan zî ferz o. Ganî semedê rêxitsibîyayîşê cinîyan paştdayîş bêro dayîş. Ganî heqê rêxistinbîyaşê cinîyan bêro pawitiş. Eynî wextî de heqê perwerdeyî û weşîya cinîyannzî ganî bikewo binê asayîşê destûrê bingehîn. Pêwa nê ganî Peymana Stenbolî bikewo merîyet û qanûnê 6284ine bi hawayêk tesîr pê bêro.”
