Serekkomarî Tirkîya Tayyîp Erdogan kombîyayîşê partîya xo de qerarê kongreya 12. ya PKK’yî erjnayî.
Erdogan vat: “Rêxistine bi qerarêko girewto, gamêka goreyê mutabaqatê ma yo cuya hempare ya şarê ma reyde eşta.”
Goreyê Erdoganî ganî hetê Sûrîye û Ewropayî zî beşdar bibê
Erdogan qiseykerdişê xo de îdia kerd ke beşdarbîyayîşê hetanê Sûrîye û Ewropayî ‘heyatî’ yo.
Serekkomarê Tirkîyayî Tayyîp Erdoganî wina vat: “Xeylê muhîm o ke hetê Sûrîye û Ewropayî zî beşdarê prosesî fesihkerdiş û çekronayîşî bibê. Herinda ke lobîyê rêxistinî yê Ewropa û dinyayî vera Tirkîya bê, ma wazenê înan hetê welatê xo de bivînê. Ma wazenê ke nameyê Tirkîya bi terorî nê, bi pîvananê averşîyayîşê merdimî, demokratîk, kultur, huner û teknolojîyî bêro pênasekerdene.”
Sipasîya seba DEM partî
Erdogan sipasîya Serekê Pêroyî yê MHP’yî Devlet Bahçelî kerd û vat: “Sere de ez sipasîya Sirri Sureyya Onder ê rehmetî ke mîyanê DEM Partî de paştîyêka pîle daye prosesî kena, ez sipasîya heme kes, hemserek û sîyasetmedaranê DEM Partîyî kena ke bi hişmendîya berpirsîyarîye têgêrayê.”
Erdoganî wina dewam kerd: “Ma pawenî ke vatişê berpirsîyarîye demo ameyoxî de zî dewam bikerê. Ma spasîya Birêz Ozel û rayberanê partîyanê bînan ê sîyasîyan kenî ke helwêstêka viraştox nê prosesî de mojnaye. Ez sipasîya serekanê pêroyî yê partîyanê muxalîfan kena, rixmo ke xo nêzdîyê prosesî nêkerd zî helwêsta negatîfî zî nêmojnaye û xeta sîyaseto berpirsîyarî ra dûrî nêkewtî.”
Ya ke ganî sîyaset biko verda tewr peyên
Erdogan karo ke ganî sîyaset bikero zî taloq kerd û vat: “Ya esasî bicaardiş o. MÎT do bi baldarî taqîb bikero ka soz yeno caardene yan nê. Demp ke rêxistine berpirsîyarîyê xo ardî ca, seba qiseykerdişî xususî û averberdişê ey sîyaset do karê xo biko. Ez veng dana her kesî ke bi hewayêko berpirsîyarîyane hedîseyan taqîb bikero.”
