Kalkanî pare kerd ke ê çekveradayîş de israr kenê la caardişê na bire bi dewleta tirke eleqedar o. Kalkanî vat: ‘’Milçîka Aştîye bi perrêkî nêperrena. Eke Aştîye bêra do di perrê ci est bê.’’
Endamê Akademîya Zanistanê Komelkîyan a Abdullah Ocalanî Duran Kalkan Medya Haber TV de rojdem ercna.
Qiseykerdişê Kalkanî ra tayê beşê girîngî wina yê:
‘’Rayber Apoyî sozê xo ard ca, Vengdayîşê Aştîye û Komelê Demokratîkî kerd û bira kongreya PKK’yî daye. PKK’yî zî kongre arê daye, bira feshkerdişî û çekverdayîşî daye. La Îmrali de vurîyayîşêk çin o. Qaşo Meclîsî do erk bikerdêne, qanûn bivetêne. La hema zî seba azadîya Rayber Apoyî gamêke nêerzîyaye. Tewirê AKP’yî de yew cidîyet hema zî çin o. Ganî vera AKP’yî teda bêra kerdene ke gamêke bierzo.
Kampanyaya ‘Ez wazena Abdullah Ocalanî bivîna’ girîng a. Ganî her kes tewrê na kampanya bibo û seba pêvînayîşê Rayber Apoyî muracat bikero. Ancî ganî Hemleya Azadîye bêra hîrakerdene. Demokratîkbîyayîşê Tirkîya pabesteyê azadîya kurdan o, azadîya kurdan pabesteyê azadîya Rayber Apoyî ya.
Hêrişê vera gerîlayan bi çekanê qedexe, kîmyewî û nukleran dewam kenê. Eke şer nêno xorinkerdene sebebê ney no yo ke gerîlayî pozîsyonê adirbirnayîşê 1ê Adare de yê. La dewlete vana qey ma qelsîya xo ra adirbirnayîş îlan kerdo. Ma bire daye ke çekan war verdê. Ma ney de israr kenê. Ma wazenê esasê sîyasetê demokratîkî de têkoşînê azadîye bikerê. La no tena bi kerdişanê ma nêbeno. Milçîka Aştîye bi perrêkî nêperrena. Eke Aştîye bêra do di perrê ci est bê.
Xora gerîlayî vera hêrişan do xo bipawê. Dewlete hêriş kena, îmha kena, qetil kena la vana ke ma çekan ganî war verdê. Na rewşe de Aştîye do senî bêra? Gerîlayî vera hêrişan do xo bipawê. PKK waştişê xo ser o çekan war verdeno. Wa çew nêvajo ke PKK bin kewto. Gerîlayî heta peynî seba pawitişê rûmetî xo û şarê xo bipawê.
Ma caardişê biranê kongre de isrardar ê. PKK û Rayber Apo qerardar o ke komelî bivurno, Tirkîya û Kurdistanî bivurno. La no zî bizanîyo ke vera hêrişanê îmha û tasfîye ma do xopawitişî bîyarê ca. Ma vat ke ganî vurîyayîş û vurnayîş bêrê caardene. Ganî her hetî ra perwerdeyê komelî bêro kerdene. Ganî sîyaseto demokratîk bi hêzî biherikîyo.
Şerê Îran-Îsraîlî cara ameyêne pawitene. Eşkera nîyo ke no şer heta key û senî dewam bikero û netîceya ci do çita biba. Beno ke Îran do bibo warê pêkewtişan û kaosan. Bingeyê ney û şeranê bînan de ferasetê dewleta neteweyîye est o. Sîstemo kapîtalîst Îsraîlî sey çeka xo şuxilneno. Xora peyê Îsraîlî de Amerîka, NATO, Înglîstan, Ewropa zî est ê. Nê wazenê ke kamo ke teslîm nêbîyo çin bikerê. Rejîmê Îranî rê zî teslîmîyet ame ferzkerdene. Ganî Îranî nê gefî bidîyêne. Eke Îranî demokrasî bîyardêne ca rayîrê bahaneyan do bigirewtêne.
Hetê bînî ra Îsraîl vano eke her kesî bin bikero do asayîşê xo bîyaro ca. La wina nîyo. Eke Rojhelato Mîyanên asayî bibo Îsraîl zî do asayî bibo. No zî bi ferasetê neteweya demokratîke mumkîn o. Çareserîya ke Rayber Apoyî pêşnîyaz kerda ganî demokratîkbîyayîş do cuya azade peyda bikero.
Şarê Rojhelatê Kurdistanî destpêkî ra nata terefê şerî de nîyo. Tewirê şarê Rojhelatî hol o. Ma eşkenê hêzanê Rojhelatê Kurdistanî rê ney pêşnîyaz bikerê ke wa yewîya xo bîyarê ca. Ma ancî veng danê ke wa Kongreya Neteweyî ya Kurdistanî bêra arêdayene. Wa partî û rêxistinê Rojhelatê Kurdistanî pîya têbigêrê.
Wa şarê Rojhelatê Kurdistanî tedbîranê xo bigêro, seba xopawitişî amade bibo, yewî û paştdayîşî bihêzêr bikero. Ganî şarê Îranî zî mîyanê îtîfaqî de bibê. Wa bizanîyo ke şarê parçeyanê bînan ê Kurdistanî û şarê kurdî yê teberî hetê şarê Rojhelatê Kurdistanî de yê.
Devlet Bahçelîyî nê şerî ser o vato ke Tirkîya binê tehlukeyî de ya. Na raşt a. Tirkîya ha binê ablûqa de ya. Îranî ra pey hedef Tirkîya ya. Eke Tirkîya azadîye bîyara ca, demokratîk biba do bixelisa û hêrişan û gefan ra xo bipawa.
Hezîrane menga şehîdan a. Ez şexsê embaze Zîlane de pêro şehîdanê ma bi rêz û minetî yad kena. Ganî ma rêçê şehîdan de Aştîye, vurîyayîş, vurnayîş û demokrasîyî bîyarê ca. Ez venga her kesî dana ke wayîrê erjanê şehîdan vejîyo.’’
