Hemsereka Konseya Rayberdişî ya KCK’yî Besê Hozat vat: “Eke muxalefet, rêxistinê komelê sîvîlî û pêro hetê komelkî têkoşînê hêzdarî bikerê, ma eşkenê nê prosesî destê nê îqtîdarî ra vejê.”
Hemsereka Konseya Rayberdişî ya KCK’yî Besê Hozat programêkê taybetî yê Medya Haber TV’yî de rojev erjna.
Besê Hozat raporo polîtîk ke Rayberê Şarê Kurdî Abdullah Ocalanî Kongreya PKK’yî ya 12. rê erşawit sey manîfestoyêk pênase kerd û nê vatî: “Nê raporî heqîqetê tarîxî fînayî çiman ver. Naye ser zaf munaqeşeyî ameyî kerdene. Vera fıkran û erjnayîşanê Rayber Apoyî rexneyê bêehleqî zî ameyî kerdene. Xora ma înan rexne kenê û raşt nêvînenê. Kesê ke nê hêrişan kenê zafê înan xayin, dişmenê şarê xo yê. Nê rapor de derheqê elewîtîye, tarîxê kurdan, Marksizm û tarîxê cinîyan de erjnayîşê neweyî yê xorîn ê Rayber Apoyî est ê. Sey cinîyan kurde, soyalîste, elewî gama ke ez manifesto wanena ez hêzêko gird gena.’’
Besê Hozat bale ant prosesê Aştî û Komelê Demokratîkî yo ke hetê Rayberê Şarê Kurdî Abdullah Ocalanî dîya destpêkerdene ser o û nê vatî: “No prosesî sey pênaskerdişê îqtîdarî ‘prosesê Tirkîyaya bêterorî’pênaskerdiş zaf xelet o. Ma nê îfadeyî, pênaskerdişî red kenê. Gerek hinî no vatiş rojdemî ra bêro vetene. Nameyê nê prosesî bewlî yo. Nameyê ci ‘Prosesê Haştîye û Komelê Demokratîkî’ o. Rayber Apoyî 27ê sibate de vengdayîşê ‘Prosesê Haştîye û Komelê Demokratîkî’ kerd. No vengdayîş bi heyetê dewlete bi mutabakatê hemparî ame kerdene. No zî mojneno ke dewlete bi xo nameyê prosesî qebul kerdo. Gerek no vatişo bîn rojdemî ra vejîyo. Wina nêbo munaqeşeyê raştî nînê kerdene.
Çîyê dîyine zî; nika bi şerê Îsraîl-Îranî reyna ame famkerdene ke proses senî muhîm o. Nika herême cehnenemêkê girdî de ya. Her ca veşeno. Nika pîya bi Îranî dora Tirkîya ameye. Herême newera yena dîzaynkerdene. Coka gerek munaqeşeyê raştî bêrê kerdene. Na babete de gerek dewlete zî îqtîdar zî game bierzo. Ma sey têgêrayîşî çîyo ke hewce keno kerd. Ma her qeyde game eşt e. Ma pozîtîf cewab da vengdayîşê Rayber Apoyî. Adirbirnayîş îlan kerd. Dima ra Kongreya 12ine ya PKKyî kerd. PKK fesih kerd.Qerarê vindarnayîşê têkoşînê çekdarî girewt. Ma nika vera Tirkîya têkoşîno çekdar vindarnayo. Vera nê gerek, dewleta tirke game bierzo. Gerek heqê sîyasetê demokratîkî bêro naskerdene. Serûberkerdişê qanûnî bêrê kerdene. Gerek warê sîyasetî bêro akerdene ke nê merdimê ke vera Tirkîya çeke şuxulnenê şirê Tirkîya de sîyaset bikerê. O ke nîyetê ci yê çareserî est o,zîhnîyet û poltîkaya ci ya çareserî est o, bado ke PKKyî qerarê feskerdiş û vindarnayîşê têkoşînê çekdarî girewt, cade roja bîne komîsyon nayêne ro. Meclîs dayêne arê, meclîsî munaqeşe kerdêne, qanûn vetêne, semedê PKKyî qanûnêk ameyêne vetene. Heqê sîyasetî ameyênî naskerdene. Serûberkerdişê qanûnê bingeyî kerdêne û gerîla zî vejîyayêne şinî, deşte de bajar de sîyaset kerdêne. Dewletêka cîddî wina kerdêne. Hende wext şi hema zî gamêke nêameya eştene. No nîno qebulkerdene.
Eke ma îqtîdarî rê biverdê, no îqtîdar nê prosesî goreyê menfeatê xo şuxilneno û çîyêk nêvejîyeno werte. Coka gerek pêro komel, rêxistinê komelê sîvîlî, muxalefet bi hewayêkê xurtî wayîrê prosesî bivejo û bikero rojdem. Semedê çarserîya pratîkî gerek projeyi bêrê pêardene û bi munaqeşeyan proses bêro averberdene. Eke muxalefet, rêxistinê komelê sîvîlî û pêro hetê komelkî têkoşînê hêzdarî bikerê, ma eşkenê nê prosesî destê nê îqtîdarî ra vejê, meverdê ê sey malzemeyêkî bişixulnê.”
