Welatijê Amedî derheqê merasîmê îmhakerdişê çekan ê PKK’yî de dîyar kerdî ke ganî dewlete zî sey hetê kurdan, bi hawayêkî raşt prosesî ra nêzdî bibo û gamanê şênberî bierzo.
30 endamanê Komeleya Aşîtî û Komelê Demokratîkî serê vengdayîşê Rayberê Şarê Kurdî Abdullah Ocalanî de Silêmanî de bi merasîmêko gird çekanê xo îmha kerdî û vengê Rayberê Şarê Kurdî Abdullah Ocalanî rê verpers da. Dima nê serebûtan hêvîya aşîtî mîyanê şarî de zêde bî. Welatijê Amedî derheqê merasîmê PKK’yî de ajansê ma rê qisey kerdî.
“Ganî êdî kayê osmanijan nêkerî”
Welatij Feyyaz Guneşî waşt ke dewlete zî gam bierzo û va: “PKK’î çekî îmha kerdî. Ganî dewlete zî hepsîyanê sîyasîyan verado. Bi hezaran hepisîyê ma est ê. Ganî bi lez înan veradî. Eke hepsîyan veradî do bawerîyêke bidî ma. Ganî kayê osmanijan nêkerî. Kurdî nê kurdê verênî yê. Eger Erdogan bivajo ‘Na serfîrazîya ma ya’ do kurdî nê yewî qebul nêkerî.”
“Eke Dewlete gam nêerzo, do bawerîya ma vînî bibo”
Welatij Nesîme Guven zî destnîşan kerd ke ê nêwazenî ke ciwanî cuya xo vînî bikerî û vat: “Ma wazenî aştî û azadî bêro ca. Zîndanî veng bibî. Bila aşîtîyêke raşt bo. Dewlete kesî nêxapîno. Ganî dewlete gam bierzo.”
“Peynîya şerî çin a”
Welatij Cemîl Baran zî ard ziwan ke aşîtî çîyêko zaf weş o û vat: “Ganî dewlete hemeyê hepisîyanê sîyasîyan verado. Bi şerî çareserî nêbena. Şer xera keno, la awan nêkeno. Ganî ma aşîtî misoger bikerî.”
Welatî Hasan Guler zî bi vîr xist ke aşîtî her wext şer ra başêr a û vat: “Dima îmhakerdişê çekan, ganî dewlete rayîrê sîyasetê demokratîkî akero. Seba aşîtî ganî dewlete gam bierzo. Ganî hemeyê hepsîyanê sîyasîyan serbest veradî.”
Welatî Emduh Guler zî dîyar kerd ke o aşîtî wazeno û vat: “Şer kiştişî ano. Dima merasîmê PKK’yî ganî dewlete zî gam bierzo. Wa aşîtî bêro ca.”
