Amed – Koçer Erhan Îlgen têkildarî Kaniya Xerzê ya li Zozanên Hesendînê diherike diyar kir ku Kaniya Xerzê derdorê zindî dike û got: “Kanî ziwa bibe jiyana me jî dê xilas bibe.”
Ji bo koçerên li zozanan dijîn hin tiştên pêwîst hene. Yek ji wan jî av e. Koçer bi kaniyan hewcedariya xwe ya avê peyda dikin. Zozan ji aliyê kaniyan ve gelek sihûdiye. Li herêmekê av tune be jiyan jî tune ye. Li Zozanên Hesendînê jî nêzî 200 kanî hene. Ya ku herî dîrokî û çîroka wê heyî jî Kaniya Xerzê ye. Ev 200 sal in bênavber av ji Kaniya Xerzê diherike. Çi havîn çi payîz her wext herikî ye û derdora xwe zindî kiriye. Koçer Erhan Îlgen têkildarî dîroka Kaniya Xerzê û giringiya avê ji ajansa me re axivî.
‘Kanî jiyanê dide me’
Erhan Îlgen diyar kir ku ew hezar sal in li vir dijîn lê dagirker dixwazin wan ji herêmê derxin û wiha axivî: “200 sal berê qewmek hatiye li vê herêmê. Navê pêşengên wan Xerzo bûye. Li vir bi zozanî rawestiyane. Ji ber pirsgirêkekê ew qewm nav hev dikeve û paşê jî ji holê rabûye. Beriya 36 salan em hatine Zozanên Hesendînê. Her sal herî kêm em 5-6 meh li Zozanên Hesendînê dijîn. Em xwediyê van axan in. Îro destê xwe dirêjî axa me dikin. Li zozanê em nikarin zêde karê çandî bikin. Ji ber ku kevir zêde ne, çandinî nabê. Ev kanî ji bo me gelek girîng in. Jiyanê dide me.”
‘Kesên li zozanê dijîn bi kaniyan jiyana xwe berdewam dikin’
Erhan Îlgen destnîşan kir ku Kaniya Xerzê ji gundê Henzê dest pê dike û ji gundên Girindesê, Toçka, Xuşav, Nêrçik, Kevrê Nivisî, Taxa Newalê, Dimilya, Mezra Jorî û heta ji Helînê re derbas dibe. Erhan Îlgen di berdewama axaftina xwe de ev tişt anî ziman: “Tevahiya herêmê bi Kaniya Xerzê tê avdan. Ev kanî qût bibe dê tevahî herêm jî bêav bimîne. Jiyana me dê xilas bibe. Li Zozanên Hesendînê nêzî 200 kanî hene. Em bi wan kaniyan zêviyên xwe av didin. Giya bi van kaniyan heşîn dibin. Ajalên me ji van kaniyan avê vedixwin. Kesên li zozanê dijîn bi kaniyan jiyana xwe berdewam dikin. Ji ber vê yekê heke li vir maden çêbibe jiyana me jî dê xilas bibe.”
