Amed – Şeniyên Zozanê Hesendînê ji bo balê bikşînin talankirina Zozanê Hesendînê dê di 26ê Tîrmehê de bimeşin Çiyayê Andokê û daxuyanî bidin. Şêniyê herêmê Mehmet Baran gel vexwedan çalakiyê û got: “Ji bo Zozanê Hesendînê em ê li Çiyayê Andok bin.”
Xwezaya Kurdistanê bi salan e bi destê şîrketên madenê tê talankirin. Bi şewitandina daristanan tê tunekirin. Yek jî wan herêman Zozanê Hesendînêye. Zozanê Hesendînê li navçeya Pasûra Amedê ye. Zozanê Hesendînê nêzî 3 hezar metre bilind e. Ji aliyê av û ajalan ve gelek dewlemend e. Lê di Zozanê Hesendînê de Şîrketa Anonîm a Bazirganiya Derve û Kanzakariyê ya Pasûrê ji bo lêgerina kanzayan bi awayekî bêhûqîqî dest bi lêgerina madanê dike. Şêniyên Zozanê Hesendînê jî 8 Tirmehê ve li dijî talankirina xwezayê dest bi çalakiya nobedê kirin. Nobed bi şev û roj berdewam dike. Şeniyên herêmê ji bo balê bikşînin ser talankirina Zozanê Hesendînê dê di 26ê Tirmehê de bimeşin Çiyayê Andokê û li vir daxuyanî bidin. Şeniyê herêmê Mehmet Baran bang gel û ekolojîstan kir û ew vexwendin meş û daxuyaniyê.
‘Em ê bimeşin Andokê’
Mehmet Baran diyar kir ku ew ê di 26ê Tirmehê de li dijî lêgerina madanê bimeşin Çiyayê Andok û wiha axivî: “Çend meh in şîrketên madenê li Zozanê Hesendînê lêgerînê dikin. Nêzî mehekê ye li dijî lêgerîna madanê me dest bi çalakiya nobedê kiriye. Em naxwazin kanên madanê li zozanên me vekin. Em ê di 26ê Tirmehê de biçin Çiyayê Andokê. Bav û kalên me bi çend salan e li Çiyayê Andokê diçin ziyaretê. Ji her derê welatî tên ziyaretê. Em ê bi meş biçin Çiyayê Andokê û şevekî li vir rawestin. Em ji gelê xwe dixwazin bên tev li çalakiyê bibin. Em ê li dijî talankirina Zozanê Hesendînê li Çiyayê Andokê daxuyanî bidin. Em gelê xwe vedixwînin daxuyaniyê.”
