Mamoste û wendekarê Komela Cigêrayîşanê Ziwan û Kulturî ya Avestayî ke ameyê girewtene, nerazîbîyayîş nîşanê mohrkerdişî da û vat ke ê do vera polîtîkayanê asîmîlasyonî heta peynî xover bidê.
Dima ke bi fermanê Walîtîyê Îzmîrî Komela Cigêrayîşanê Ziwan û Kulturî ya Avestayî ameye mohrkerdene, no qerar rastî reaksîyon û nerazîbîyayîşî ame. Mamoste û wendekarê Komeleyî qerarê girewtişî bi şîdet şermezar kerd û waşt ke komela înan bi lez bêra akerdene.
‘Ganî sînayoxê ziwanê Kurdkî bêveng nêmanê’
Mamosteyê Komele Alî Sayanî dîyar kerd ke bi serran o ê Îzmîr de kar û xebatanê ziwanê Kurdkî kenê û vat ke no helwêsto faşîzan ê hukmatî vera ziwanê Kurdkî yo. Sayanî veng da heme sînayoxanê ziwanê Kurdkî û waşt ke hemverê qerarî helwêst nîşan bidê û bêveng nêmanê.
‘Ma do vera polîtîkayanê asîmîlasyonî sere nêtewnê’
Mamosteyanê Komele ra Mansur Kuyumcuyî zî da zanayene ke se serrî yo ke înan vera polîtîkayanê asîmîlasyonî sere wedarnayo û vat ê do tı wext vera nê polîtîkayan sereyê xo nêtewnê.
‘Ganî her kes wayîrê Komele vejîyo’
Mamosteyê Komele Cuneyt Lalogluyî za vat ke ziwanê Kurdkî rûmetê înan o û waşt ke her kes wayîrê ziwanê xo yê dayîke vejîyo.
Wendekarê Komele Serkan Çîtfçîyî qerarê mohrkerdişê Komele şermezar kerd û vat ke ê do Îzmîr ra heta Medya û Mezopotamyayî, Amed ra heta koyanê Kurdîstanî ziwanê Kurdkî bipawê.
Wendekara Komele Îndira Donmez zî da zanayene ke a bi saya Komele ziwanê Kurdkî musaya û waşt ke Komela Avesta bi lez bêra akerdene.
Wendekara Komele Şukran Adiyaman dîyar kerd ke ziwanê Kurdkî ziwanêko xeylê zengîn o û hetê mîlyonan ra yeno şuxulnayene û vat heqê kesî çin o ke ziwanê Kurdkî qedexe bikero.
