Sêrt – Bi destê Walîtiya Sêrtê û cerdevanên gundê Hosyanê bi hezaran darên li Herêma Bestayê tên birîn. Me xwe gihand cihê dar tên birîn û talana tê kirin tomar kir. Hate îdiakirin ku Waliyê Sêrtê jî şirîkê firotina êzingan e.
Li gundê Omyanisê ya bi ser navçeya Berwariyê ya Sêrtê ve bi destê walî, Gerînendeyê Daristanan ê Sêrtê û cerdevanên gundê Hosyanê bi hezaran dar li gel nerazîbûnên gundiyan jî hatine birîn. Weke Ajansa Welat beriya niha em ketibûn Herêma Besta ya di nava sînorên Şirnexê de û niha jî weke ajans em ketin Herêma Besta ya di nava sînorên Sêrtê de ye û me birîna daristanan tomar kir.
Daxuyaniyên Walîtiya Şirnexê ne rast in!
Herêma Besta dikeve nava tixûbên Şirnex û Sêrtê û ji 2018an heya îro li vê herêmê birîna daran didome. Her çiqas Walîtiya Şirnexê daxuyanî bide û ji hin saziyên civaka sîvil ên nêzî xwe re bibêje me talana daristanan rawestandiye jî ev yek ne rast e. Ji ber ku heya duh jî birîna daran li Herêma Besta ya dikeve nava sînorên Şirnexê de bi tonan êzing li TIR û kamyonan tên barkirin û dibin difiroşin. Her wiha li gelek deveran lodên êzangan jî balê dikişînin ser xwe.
Îhaleyê dane cerdevanan
Piştî îhaleya Gerînendeya Çandinî û Daristanan a Sêrtê ku ji bo birîna daristanên gundê Omyanisê pêk anî û ev îhale ji aliyê cerdevanan ve hatiye girtin. Bi dehan makîneyên darbirînê û bi gelek traktor û karkeran berê xwe dane herêmê û bênavber daran dibirin. Şêniyên gund ku ji ber ewlehiyê nexwestin navê xwe bidin diyar kirin ku wan ji bo rawestandina birîna daran telefon ji Gerînedehiya Çandinî û Daristanan a Sêrtê û li cendermeyan geriyane lê piştî vê yekê cerdevan li şêniyên gund geriyan e û gef li wan xwarine.
Daristan di çavdêriya leşkeran de tên talankirin
Dema em ketine Herêma Tenîre, Xwara Serdikê, Xwara Seîd, Gera Wirwiro yên gundê Omyanisê ku dar lê tên birîn û daristan tên talankirin, gelek traktorên bêxwedî li kêlake darên hatine birîn rawestiyan e. Her wiha bi dehan ton darên hatine birîn li binê Qaleqola Berê Adga li ser hev hatine komkirin. Tê îdiakirin ku Waliyê Sêrtê û Gerînendeyê Çandinî û Daristanan yê Sêrtê jî şirîkên sercerdevan Medenî Bîlen û Mehmet Bîlen in ku van daran dibirin û difiroşin.
‘Talan bi destê Walîtiya Sêrtê pêk tê’
Hevserokê Meclîsa Bajêr ê Şirnexê Galîb Kulter ku ji gundê Omyanisê ye got ku daristan bi biryara Walîtiya Sêrtê tên birîn û wiha axivî: “Bi awayek zordarî daristanên me dibirin. Bi Destê waliyê Sêrtê, cerdevanan û kesên rantê ev yek tê kirin. Ji ber vê talanê êdî em nikarin di gund de sewalên xwe xwedî bikin. Xwezaya me hemû mehû kirin. Em vê yeke ji van kesan re qebûl nakin.”
