Kombîyayîşê çarin ê Komîsyonê Piştîdayîşê Neteweyî Wayûbirayî û Demokrasî, meclîs de dest kerd ci. Rojeva kombîyayîşê ewroyî de kesanê ke nê şerî nêzdîyê xo kerdê vîndî yênê goştaritene.
Çarçiwa prosesî yo ke seba çareyê meseleya kurdan dewam keno de, Kombîyayîşê 4. yê Komîsyonê Piştîdayîşê Neteweyî, Wayûbirayî û Demokrasî yo ke Meclîs de ameybî sazkerdene, ewro û meşte do bêro serûberkerdene.
Kombîyayîş bi serekîya Serekê Meclîsî Numan Kurtulmuşî de bêro serûberkerdene dest bi ronîştene kerd.
Kesê ke Merdimê xo nê şerî de kerdê vîndî do bêrê goştaritene
Roniştişê verên ê kombîyayîşî yo ke bi di roniştişan bêro serûberkerdene de, Wezîra Keye û Xizmetanê Komelkîyan Mahinur Özdemir Göktaş do pêşkêşî bikero.
Dima ra temsîlkarê Komela Xazîyanê Melûlan ê Şerî, Komela Vîya û Sêwîyan ê Şehîdan, Weqfê Keyeyanê Xazî û Şehîdan ê Tirkîya û Weqfê Piştîdayîşê Nêzdîyanê Şehîdan û Xazîyan ê Tirkîya do qisey bikerê.
Roniştişê dîyin de zî keyeyê ke Amed de nobete gênê do bêrê goştaritene.
Kombîyayîşê meşteyî de do kamî qisey kerê?
Kombîyayîşo pancin ê komîsyonî zî do meşte (20 Tebaxe) bêro serûberkerdene. Roniştişê veren ê nê kombîyayîşî de zî Dayikê Roja Şemeyî û Dayikê Haştîye qisey kerê.
Roniştişê dîyin ê meşteyî de Weqfê Heq û Azadîyanê Merdiman û Hetkarîya Merdimî (İHH), Komela Heqanê Merdiman (İHD), Komela Heqanê Merdiman û Seba Mazluman Piştîdayîşî (MAZLUMDER) û Weqfê Heqanê Merdiman ê Tahir Elçî do bêrê goştaritene.
Komîsyonî kombîyayîşo hirêyin 12 Tebaxe de serûber kerdîbî. Nê kombîyayîşî de partîyanê sîyasîyan nameyê kes û sazgehanê ke wazenê ke komîsyon de bêrê goşdaritene pêşkêş kerdîbî.
Lîsteya Partîya Têduştî û Demokrasîya Şaran (DEM Partî) ya ke pêşkêş kerdîbî de hetê organîzasyonanê heqanê merdiman, huqûq û komelanê sivîlan de organîzasyonê cinîyan, komelê heqanê gedeyan û kesê ke warê zîwan-kulturî de pispor ê zî ca girewtiybî.
Mebûsê Partîya CHP yê İzmîrî Murat Bakanî zî komele, weqf û sendîkayê ke partîya xo wazena ke dawetê komîsyonî bibê û raya înan bêra goşdaritene, beyan kerdîbî.
