Rojnameger Şivan Misî ku li herêma Kobanê rojnamegeriyê dike û geşedanan ji nêz ve dişopîne bi lêv kir ku li dijî êrişên Tirkiye û komên çekdar ên girêdayî wê li Bakur û Rojhilatê Suriyeyê gel bi rihê şerê gelê şoreşgerî li qadan in û got: “Divê li hundir û derveyî welêt her kes rabe ser piyan.”
Êrişên komên çekdar ên giredayî Tirkiyeyê li ser herêmên Bakur û Rojhilatê Suriyeyê berdewam dike. Ji aliyekî ve komên çekdar ên giredayî Tirkiyeyê êrişên xwe li ser Tişrin ve Qereqozax berdewam dike û ji aliyê din ve jî Tirkiyeyê bi SÎHAyan gundên Kobanê bombebaran dike. Rêveberiya Xweser a Demokratîk a Bakur û Rojhilatê Suriyeyê li dijî êrişên Tirkiyeyê û komên çekdar ên giredayî wê bang li gel kir ku di nava seferberiyê de bin û hemû gundên Kobanê biparêzin. Li gor agahiyên çavkaniyên li herême jî Tirkiye û komên çekdar ên giredayî wê ji bo êrişeke berfireh li ser Kobanê bikin di nava amadekariyê de ne. Her wiha Yekiniyên Parastina Gel (YPG) û Yekiniyên Parastina Jinan (YPJ) li Tişrîn û Qereqozaxê bersivên êrişên komên çekdar didin û nahelin bikeve destê wan.
‘Hemû êriş têk çûn’
Rojnamevan Şivan Misî ku li herêma Kobanê rojnamegeriyê dike û geşedanan ji nêz ve dişopîne tekildarî geşedanan ji Ajansa Welat re axivî. Şîvan Misî bi lêv kir ku armanca Tirkiyeyê ya yekem dagirkirina Kobanê ye û ev tişt gotin: “Di van rojên dawî de li Bakur û Rojhilatê Suriyeyê rewşek awarte û nîşaneya tehlûkeyê heye. Êrişên dagirkeriya tirk û komên çekdar ên pêve girêdayî bi taybetî li herêma Firatê ku rojane êriş li ser Bendava Tişrîn, Pira Qereqozaq û bajarê Kobanê hene. Di riya van êrişan de dixwazin Kobanê dagir bikin û pirojeya Rêveberiya Xweser têk bibin. Di heman demê de ku rewşek tevlihev û nediyar li Sûriyê heye, dixwazin ji xwe re wekî firsat van deveran dagir bikin. Helbet ev êriş giran in ku rojane bi balafirên xwe yên bê mirov û bi çek di heman demê de bi top û tangan êriş dikin. Lê li hember van êrişan şervanên HSDê berxwedaniyek bê hempa raber dikin û heya niha tevahî êriş têk çû.”
‘Ku Kurd û netewên din nebin dê alozî zêde bibe’
Di berdewama axafitna xwe de Şivan Misî bal kişand ser deklerasyona Rêveberiya Xweser û wiha dirêjî da axaftina xwe: “Deklerasyona Rêveberiya Xweser ku li hemû aliyên Suriyeyê bang dike, nîşan dike ku aştiya civakî û çareseriya siyasî pir girîng e. Hikumeta nû ya Suriyê HTŞê vê yekê baş dizane, lê heta niha dê çareseriyek çawa ji bo van herêman pêk bîne nediyar e. Qonaxa nû ya Suriyê dirêjkirina rewşa siyasî û avakirina pêvejoya siyasî diyar dike. Rêveberiya Xweser bang kiribû ku tevahî aliyên kurdî bi hev re pêwîste biçin Şamê û ev pirsgirêk were çareserkirin. Lê li gorî min û wekî her kes dizane ku di Sûriya nû de eger Kurd nebin û pirsgirêka Kurd û tevahî netewên din çareser nebe ewê aloziya Sûriyê kûrtir bibe û bê Kurd çareser nabe.”
‘Divê gel rabe li ser piyan’
Di dawiya axaftina xwe de Şivan Misî destnîşan kir ku li dijî êrişên Tirkiye û komên çekdar ên giredayî wê taybet li Kobanê û li tevahî gelê Bakur û Rojhilatê Suriyeyê gel rabûye ser pêyan û wiha dawî li axaftina xwe anî: “Gelê Bakur û Rojhilatê Suriyeyê, bi taybetî ji aliyê civakî û bi rihê şerê gel yê şoreşgerî li qadan in, li dijî van êşrişan biryara wan pir zelal û aşkere ye ku ew ê heta dawiyê welatê xwe biparêzîn. Pêdivî heye ku zêde sekneke civakî ava bikin. Divê li hundir û derveyî welêt her kes rabin ser piyan.”
