Dayîkê Aştîye derheqê hêrişê Tirkîya û SMO yê hemverê Rojawan de qisey kerdî û vatî ke dewamê tecrîdî de hêrişî dewam kenê û dîyar kerdî ke Kobanê hêvîye şaran o
Serkêşîya Platformê Sazgehê Demokratîke (DEKUP) de, çarçewaya kampanyaya “Abdullah Ocalanî rê, meseleya Kurdî rê çareserî” 16ê kanûnê de Amed ra ver bi Enqere bi wedaritişê tecrîdî, vindarnayîşê hêrişê hemverê Bakûr û Rojhelatê Sûrîye “Rayîrşîyayîşê Çareserîya Demokratîke û Azadîye” ame destpêkerdiş.
Dayîkê Aştîye yê Edeneyî tewrê rayîrşîyayîşî bîyî, derheqê hêrişê Tirkîya yê hemverê Bakûr û Rojhelatê Sûrîye de qisey kerdî.
Şemsê Bagdu bale ant serra 2014ine ser û vat: “Ma nêwazenê eynî rewşa serra 2014ine de Kobanê qewimyayî biciwîyê. Senî ke o wext merdimî ameyî surgûnkerdiş, do nika zî koçber bibê. Ma aştî û edalet wazenê. Wazenê Kurdan çin bikerê. Eke hêrişê Kobanê bikerê, do felaketê pîlî rî bidê. Kobanê hêvîya şaran o. Wa fek nê şerê lişînî ra vera bidê. Ganî êdî çeteyê şima hêrişê şarî nêkerê. Ma vînenê ke çete çi xirabî kenê. Ma do heta dilopê gonîya xo ya peyîne têkoşînê xo dewam bikerê.
‘Ez xoverdakaran silam kena’
Dayîka Aştîye Tenzîle Turgay zî wina vat: “Ez hêrişê Rojawanî şermezar kena. Wa peynîya nê polîtîkayanê şerî yê ke ma ser de kenê, bîyarê. Êdî bes o, tutanê ma qetil mekerê. Ti vanê qey semedê asayîşê şarî ti şiyî uca la ti zûran kenê. Kobanê ê ma ya. Biciwîyo xoverdayîşê Rojawanî. Ez kesê ke uca de xo ver danê silam kena.”
‘Ganî berê Îmraliyî bêrê akerdiş’
Fatma Kaplan zî reaksîyonê xo wina ard ziwan: “Tutanê kurdan yenê qetilkerdiş. Ma şer nêwazenê. Rojawan ser o kayêk lişîn yeno kaykerdiş. Coka ma do rayîr ra şêrê. Ganî berê Îmraliyî abibê. Semedo ke çareserîya meseleyan Îmrali yo. Rojawan de sîvîlî yenê qetilkerdiş. Hêvî kena no rayîrşîyayîş bibo sebebê aştî û azadîye.”
Ayşe Alagaş zî dîyar kerd ke hêrişê Rojawanî dewam kenê û vat: “Heta ke destê ma ra bêro ma do têkoşîn dewam bikerê. Ma tecrîdê Îmraliyî şermezar kenê. Dewamê tecrîdî hêrişê ewro yê Rojawanî yê. Ma sey şarê Kurdî, bîyaye bîyî û ma do bîyayîşê xo dewam bikerê. Kurdan ti wext sereyê xo nêtewêna.”
