Serekwekîlê DEM Partî Sezaî Temellî kombîyayîşê çapemenî de dîyar kerd ke seba çareserîya meseleyê kurdî ganî komîsyon wezîfeyê bîyaro ca û Rayberê Şarê Kurdî Abdullah Ocalan reyde pêvînayîş bikero.
Serekvekîlê Grûba Partîya Têduştî û Demokrasîyî yê DEM Partî Sezaî Temellî derheqê hedîseyanê rojevî de meclîs de eşkerayî daye çapemenî. Sezaî Temellî bale ant serrgêra Malazgirî ser o û vat: “Şarê kurd û tirk bi hezaran serrî yo bi wa û birayî ciwîyenê. Lazim o na wa û birayî bi qanûnan çarçewaya hemwelatîya têduşt de bêra teqezkerdene.” Sezaî Temellî bale ant komîsyono ke meclîs d eameyo awankerdene ser o û wina domna: “Ganî komîsyon êdî muhîmîya karê xo bizano. Ganî êdî bale bianco babeta esasî ser o. Seba ke wezîfeyê xo bîyara ca ganî bi baldarî gamanê laziman bierzo û rayîrê xo bidomno. Eşkerayîya birêz Numan Kurtulmuşî ra ma musayî ke heta nêmeyê aşma êlule heyetan bigoşdarê. Goşdarîkerdişê heyetan muhîm o. Beşdarîya komelî ya komîsyonî muhîm o. Ganî bi lez komîsyon şêro hetê xeylê kesan. Ganî înan reyde têkilî rono û amanc û pêşnîyazanê înan bigîro. La no karo esasî nîyo. No komîsyono cêrin reyde eşkeno bêro kerdene. Karo esasî yê komîsyonî ganî bi lez programo qanûnî ke nê prosesî de lazim o, o bêro amadekerdene. Seba amadekerdişê nê programî zî xebatêka fedakarî û bi baldarî lazim a.”
‘Nê welatî de 25 mîlyon kurdî ciwîyenê’
Sezaî Temellî dewamê qiseykerdişê xo de bale ant destûrnêdayîşê qiseykerdişo bi Kurdkî û wina vat: “Dayîkê Aştî ameyê tîya. La qebul nêkerd ke bi Kurdkî qisey bikerê. Meclîsê Pêroyî de meclîsêk est o ke tehemulê di cumleyanê Kurdkî nêkeno. Eya ziwanê fermî yê xebata meclîsî Tirkî yo la merdimî eşkenê xo bi ziwananê cîyayan zî îfade bikerê. Nê welatî de 25 mîlyon kurdî ciwîyenê. Hem bi Kurdkî hem bi Tirkî cuya xo domnenê. Nê semedî ra peygoşkerdişê Kurdkî, nê kerdişê vera Kurdkî bi rastî şermêko pîl o. Ganî no şerm biqedîyo. Ma na babete de veng danê Serekê Meclîsî zî kenê. Ganî meclîs nê şermê xo ra bi lez agêro. Êdî ma rê xebatê meclîsî lazim ê rastîya komelî nas kenê.
‘Ganî komîsyon birêz Abdullah Ocalan reyde pêvînayîş bikero’
Sezaî Temellî dîyar kerd ke seba ke komîsyon karê xo biresno encamêk ganî Rayberê Şarê Kurdî Abdullah Ocalan reyde pêvînayîş bikero û wina domna: “Seba ke komîsyon karê xo biko ganî birêz Abdullah Ocalan reyde pêvînayîş bikero. Ganî biserûber pêvînayîşan bikero. Komîsyon nêeşkeno na babete peygoş bikero. Seba ke muxatabo esasî yê prosesî birêz Ocalan o. O keso ke mesela vete orte rayîrê çareserî nîşan dayo û sebebo bingeyîn ê awanbîyayîşê nê komîsyonî no yo. Komîsyono ke birêz Ocalan reyde pêvînayîş nêkero, nêeşkeno rayra şêro. Nê semedî ra ganî bi lez şêro Îmrali. Ganî her kes seba pêvînayîşî bibo hetkar.”
