Encamnameya Konferansa Ciwanên Rojavayê Kurdistanê yên li Ewropayê hate diyarkirin. Li gorî encamnameyê dê nûnertiya ciwanên li Ewropayê were avakirin û li derveyî partî û kesan ev ev nûnertî ji bo yekîtiya netewî xebatan bimeşîne.
Encamnameya Konferansa Niştimanî ya Ciwanên Rojavayê Kurdistanê yên li Ewropayê ya ku di 30’ê Tebaxê (2025) de li Almanyayê, bi beşdariya ciwanên ji Almanya, Danîmarka, Belçîka, Holanda, Fransa, Awusturya, Brîtaniya, Siwêd û Kanadayê ji aliyê Înîsiyatîfa Vejînê ve hatibû lidarxistin, hat weşandin.
Ciwanan 13 komxebat çêkirin
Di encamnameyê de hat bibîrxistin ku di konferansê de ji bilî axaftinan, 13 xebatên atolyeyê jî hatine meşandin. Hat diyarkirin ku atolye ji aliyê beşdarên pispor ve li ser mijarên xwendekar, tenduristî, endezyarî, rêxistinên civaka sivîl, hunermend û bandorkerên medyaya dijîtal, nivîskarî û mamostetiya zimanê Kurdî, aborî, rêveberî û karsazî, akademîsyenî, ciwanên partiyên Kurd, civak, teknolojiya agahdariyê (IT), perwerdehiya pîşeyî û parêzerî hatine lidarxistin.
Encamên Konferansê
Di encamnameyê de plansazî û pêşniyarên ku ji konferansê derketine jî, wiha hatine rêzkirin:
Plansazî:
1- Ji pêkanîna projeyên hatine amadekirin xebat werin meşandin.
2- Înîsiyatîfa Vejîn dê ji bo birêxistinkirina hemû pisporiya ciwanan bixebite, ji bo ku nûnertiya ciwanan a li diyasporayê bi awayeke xurt û hevgirtî pêşbikeve, wê xebatên sazûmanî bên meşandin.
3- Ji bo hemû projeyan wê piştgiriya guncaw bê dayîn, ji bo pêkanîna wan destek bê dayîn.
4- Ji bo pêkanîna projeyan û pêşxistina xizmetguzarî û sazmûaniya li Rojavayê Kurdistanê, wê têkiliyên bi rêxistinên civaka sivîl û rêxistinên Rêveberiya Xweser re werin xurtkirin.
5- Projeyên tên amadekirin, dê hemû herêmên Rêveberiya Xweser û herêmên dagirkirî (Efrîn, Serêkaniyê û Girê Spî) bigire nav xwe û bi taybet li ser mijara zarokên şehîdan bisekinin.
6- Nûnertiya ciwanan a ku dê bê damezrandin, pêwîste li derveyî berjewendiyên partîzanî û kesan dê bi awayekî serbixwe û li gorî nêzîkatiyeke sazûmaniya pêşketî ku pisporiya ciwanan vediguhêzîne Rojava û hemû beşên Kurdistanê kar bimeşîne.
7- Komîteyeke krîzê bê avakirin da ku di rewşên awarte de bi lez xebata xwe bimeşîne.
8- Ciwanên Kurd ên li derveyî welat teşwîq bikin ku tevlî partiyên Ewropî bibin û di nav wan de ji bo xizmeta doza Kurd bixebitin.
9- Semînerên cur be cur ên diyalog û çandî orgenîze bikin da ku têghiştina hevbeş û hevgirtinê di navbera komên ciwanan ên li derveyî welat nemaze yên siyasî de zêde bikin.
Pêşniyarên konferansê:
1- Yekitiya Kurdan tenê bi sloganan sînordar nemîne, di jiyanê de bi rêya çalakiyên hevbeş û qebûlkirina yên din bê pêkanîn.
2- Bang li dezgehên çapemeniyê fermî yên Kurdî bikin ku ji parçebûn, teşwîqkirin û gotinên nefretê yên di nav civaka Kurd de dûr bisekinin.
3- Li ser medyaya dijîtal zimaneke yekgirtî were bikaranîn da ku çarenûsekek hevpar were pêşxistin û ji nakokiyên navxweyî dûr bisekinin.
4- Ji gotinên nefretê li Rojava bi taybetî û Sûriyeyê bi giştî dûr bisekinin.
5- Kesên ku bi zorê ji Efrîn, Serêkaniyê û Girê Spî koçber bûne, ji bîr nekin. Ji bo vegera wan a bi ewle, vegerandina milkê wan û dabînkirina piştgirya guncaw ji wan re bixebitin.
6- Encamên Konferansa Yekrêzî û Yekhelwesta Kurdî li Rojavayê Kurdistanê ya ku li Qamişlo hatibû lidarxistin, nûnertiya ciwanên Kurd ên li derveyî welat jî dike û ji bo pêkanîna wê dê xebat bê meşandin.
7- Wekî parêzvanên gelê Rojava û gelên herêmê, li pişt Hêzên Sûriyeya Demokratîk (QSD) bisekinin û amade bin ku di her şerekî de piştgiriyê bidin wan.
8- Di rewşên şer de mafê hemû hêzên Kurdî heye ku Rojava û gelê wê biparêzin.
9- Rê li ber ciwanan vekin ku roleke mezintir di biryardanê de bilîzin û bibin beşeke çalak a pêvajoya siyasî ya li Rojava.
