Wan – DADSAZê yekemîn kongreya xwe ya asayî li dar xist. Di kongreyê de hat destnîşankirin ku armanca wan avakirina zimanekî hiqûqî yê bi Kurdî ye.
Komeleya Vekolîn û Perwerdeya Hiqûqê (DADSAZ) ku li Wanê ji bo pêşvebirina lîteratûr û termên hiqûqê hatiye damezrandin, yekemîn kongreya xwe ya asayî li Eywana Tahîr Elçî ya Baroya Wanê li dar xist. Nûnerên sazî û dezgehên sivîl, rewşenbîr, nivîskar û komeleyan tev li kongreyê bûn.
‘Ziman kevirê bingehîn ê hiqûqê ye’
Di kongreyê de ewilî dîwan hat diyarkirin û dû re hiqûqnas Sabîr Ebdulahîzad mafê axaftinê hilgirt. Sabîr Ebdulahîzad, da zanîn ku ziman kevirê bingehîn ê hiqûqê ye û got: “Di vî warî de, hiqûqa Kurdî pir girîng e. Bi salan e gelê me bêstatuyeke hiqûqî maye, ji ber vê yekê hiqûqek nivîskî tune ye. Armanca me ew e ku em vê hiqûqê saz bikin. Divê em sîstema hiqûqî ya ku gelê Kurd di dîrokê de pê re jiyaye lêkolîn bikin û li ser vê bingehê normekê bi pêş ve bibin. Ger em vê yekê bi dest bixin, dema ku Kurd statûyê bi dest bixin, em ê xwe di her aliyê hiqûqê de bi tevahî amade bibînin. Dema ku mirov bi zimanê xwe, xwe diparêzin, tama û wateya vê yekê cûda ye. Ji bo vê yekê, pêdivî ye ku ziman were azadkirin. Ger ziman were azadkirin, zimanê hiqûqî jî dê were azadkirin û pêşxistin. Kurd bi salan e ji hêla ziman ve hatine asîmîlekirin. Ji bo vê yekê, divê em pêşî vê zordariya derûnî ji holê rakin û dûv re zimanê xwe di her warî de pêş bixin. Mirov çiqas bêtir zimanê xwe fêr bibe, ew qas dikare ji bo azadî û statuya zimanê xwe şer bike.”
‘Kurdî di her warî de têr û dewlemend e’
Pişt re, Hevserokê DADSAZê parêzer Sîpan Gokhan axivî û diyar kir ku hiqûqa bi zimanê dayikê li seranserê cîhanê û di mijarên hiqûqî de pir girîng e. Sîpan Gokhan, anî ziman ku ew weke parêzerên Kurd, dixwazin vê mîrateyê ji nifşên pêşerojê re bihêlin û wiha li axaftina xwe zêde kir: “Armanca DADSAZê standartkirina zimanê Kurdî û avakirina zimanekî hiqûqî yê Kurdî ye. Weke komeleyê, em her çarşemê nîqaşên hiqûqî li dar dixin. Di serdema pêş de, em armanc dikin ku normên hiqûqî yên welatan wergerînin Kurdî. Heta niha 6 hezar peyvên hiqûqî wergerandine Kurdî. Kurdî di her warî de têr û dewlemend e. Divê em ji zimanê xwe bawer bin; ew ji bo parastina her qada hiqûqê têr e. Tekane tiştê ku divê em bikin ew e ku ji bo vê yekê têbikoşin.”
Piştî axaftinan ji bo hevserokatiya komeleyê Zeynep Kûtlûk û Sîpan Gokhan hatin hilbijartin.
