Akademîsyen Sebahattîn Şen di gotûbêja ku ji hêla Baroya Wanê ve hat lidarxistin de axivî û got: “Siyaset û huner ji hev nayên veqetandin.”
Komîsyona Zimanê Kurdî ya Baroya Wanê li Eywana Konferansê ya Tahir Elçî ya baroyê li ser mijara “Sînemaya Kurdî” gotûbêjek li dar xist. Di gotûbêjê de akademîsyenê Zanîngeha Yuzuncu Yilê ya Wanê Dr. Sebahattin Şen weke axêver cîh girt. Parlamenterê DEM Partiyê yê Wanê Mahmûd Dîndar, hevşaredarê Bajarê Mezin ê Wanê Abdullah Zeydan û gelek kes tev li panelê bûn.
Sebahattîn Şen diyar kir ku piştî salên 90î behsa sînemaya Kurdî hat kirin û got “Sînemaya Kurdî di van demên dawî de derketiye holê û pêş ketiye. Dema ku Yilmaz Guney fîlm çêdikir, sînemaya Kurdî tunebû û qet behsa wê nedihat kirin. Sînemaya Kurdî nû ye û nêzîkî 30 salan e tê çêkirin. Sînemaya Kurdî xwedî taybetmendiyên xwe yên bêhempa ye. Piştî salên 1990î, mirovan dest bi axaftina li ser sînemaya Kurdî kir û di wê serdemê de sînema derket pêş û hêdî hêdî qadeke nû hat afirandin. Hem ji hêla pratîkî ve hem jî ji hêla teorîk ve pêş ket. Dema ku tevgera azadiyê mezin bû û rêveberiya xwe ava kir, sînemaya Kurdî di destê gelê Kurd de pêş ket. Yek ji taybetmendiyên sînemaya Kurdî ev e ku ew bi rewşa gelê Kurd ve girêdayî ye. Çawa ku gelê Kurd belav bûye, sînemaya Kurdî jî belav bûye. Fîlm û belgefîlm li her cihê ku Kurd lê dijîn têne çêkirin. Festîval jî di pêşveçûna sînemaya Kurdî de roleke girîng dilîzin.”
‘Helwestek dij-kolonyal e’
Sebahattîn Şen diyar kir ku pêkhatina sînemaya Kurdî bi xwe bertekek bû û got: “Bi saya sînemayê, Kurd dikarîn bibêjin ‘Ez heme’ û ev helwestek dij-kolonyal e. Derhêner di dewleta me ya kolonyal de derketin holê. Tirkîkirin çêbû û her wiha Kurdbûn jî hebû. Derhêner di vê çarçoveya kolonyal de hatin teşegirtin. Ziman jî di sînemaya Kurdî de rolek bingehîn û girîng dilîze. Fîlozofê Fransî dibêje, ‘Siyaset û huner ji hev cuda nînin, ew yek in. Yên ku peyvên wan tune ne nikarin siyasetê bikin.’ Siyaset û sînemaya Kurdî têkoşîna peyv û aqil e.”
Gotûbêj bi pirs û bersivan bi dawî bû.
