Qezaya Kanîreş ya Çewlîgî de otobusa rayîrwanan varayîşê vewre û cemidîyayîşî ra şîye çep. Qeza de doktoro newe Osman Zekî Tuncel û cinîya ey Emîne Tuncel ke 20 serre bî, cuya xo vîndî kerde.
Qeza saete 00:30 de nêzdîyê Dewa Kumbetî ya Qezaya Kanîreş de ameye meydan. Otobusa Fîrmaya Cesur Bingolî ke Çayelîya Rîze ra şîyêne Mersîn, varayîşê vewre û cemidîyayîşî ra şîye çep. Qeza de rayberê otobusî kontrolê erebe vînd kerd.
Rayîran ra doktor Osman Zekî Tuncel ke 26 serre bî û cinîya ey Emîne Tuncel ke 20 serre bî, cuya xo vîndî kerde. 16 kesî zî birîndar bîyî. Ser vengdayîşî ra ekîpê weşîye şîyî cayê qeza. Birîndarî badê mudaxeleyê verênî neqlê Nêweşxaneyê Dewlete yê Kanîreş bîyî.
Walîyê Çewlîgî Ahmet Hemdî Usta derheqê qeza de hesabê xo yê Xî ra va ke otobusî de 23 kesî est bî û qeza de di kesî merdî. Ey va birîndarî goreyê rewşa xo beno ke Nêweşxaneyê Dewlete yê Çewlîgî neql bibê.
