Şarê dewa Qerqebazarî yê qezaya Kanîşerî, vera projeya JES’î ya fîrmayêka Îngilizan, serê wedarnenê. Dewijan dîyar kerd ke înan ra destûr nêameyo girewtene û ey do heta peynîye herra xo vera nê projeyê bipawê.
Qezeya Kanîreş ya Çewlîgî, şarê herême vera projeyê Santralê Enerjîya Jeotermalî (JES) û awankerdişê polîganan reaksiyon da mojnayenê û qebûl nêkenê. Nika zî dewa Qerqebazarê ya ke girêdayeya qezaya Çewlîgî ya hedefê JES’î de ya. Welatijanê dewe dîyar kerd ke no proje do bibo sedemê wêrankerdişê xoza û do peynîya heywan weyekerdişî bîyaro. Projeyê ke bi nameyê “enerjiye” serê hêga û mergan de viraştişê înan yenê plankerdene, rastê reaksîyonê şarê herême yenê. Şarê Kanîreşê îfade kerd ke pawitişê xoza, pawitişê rûmet û ameyoxê înan o.
‘Ma îmza kom kerdê, ma do destûr nêdanê’
Şarê dewe ra Yasîn Ozagan, îfade kerd ke o dewijan reyde vera nê projeye ameyê têhet û wina vat: “Ma nêwazenê JES dewa ma de virazîyo. Ma ko û herra xo nêdanê înan. Ma îmza kom kerdê û ma do tekoşînê xo bidomnê. Heta nika tu idarekar nêameyo û ma ra destûr nêgirewto. Destûrê ma çin o û ma detûr nêdanê ke firmaya îngilizî tîya de bixebitîyo. Ma veng danê heme kesan ke hetkarîya ma bikerê.”
‘Proje xeta fay ser o yo’
Şarê dewe ra Mihemed Armanc zî bale ante serê tehlukeyê erdlerzî û tesîrê heywan weyekerdene û îfade kerd ke herême merkeze heywan weyekerdene ya û wina dewam kerd: “No proje do bibo sebeb ke merdimî dewanê xo ra koç bikerê. Dewê ma bi hênîyanê xo û bi citkariya xo yena naskerdene, tena dewa ma de 10 hezar pesî est ê. Heto bîn ra zî xetê fay yê Gimgimî û Çewlîgî tîya de resenê yewbînan. Wazenê xeta fay ser o sondaj bikerê. Wexto ke amê tîya, ma xapênayê, yewî vat ke seba JES’î yo. Ma destpêke de hetkarîya înan kerd, la eşkera bi ke amancê înan xerabkerdişê xozaya ma ya.”
