Şaristanokê Vartînîsî de 3ê teşrîna verêne ya 1993î de leşkeran eşt dewe ser o û keyeyê Ogutî ra may, pî û 7 gedeyê înan keye de veşnayê. Dewaya Vartînîsî de bêyî ke versucî bêrê cezakerdene, dosya bi bahaneyê “vîyartişê demî” ameye girewtene. Keyeyê Ogutî vera nê muracatê AYM’yî kerd û paweyê qerarî ya.
Şaristanokê Vartînîsî yê girêdayeyê Têlî (Korkut) ya Mûşî de 3ê teşrîna verêne ya 1993 de keyeyê Mehmet Nasir Ogut û Eşref Ogut û gedeyê înan Sevîm Ogut (13), Sevda Ogut (12), Mehmet Şakir Ogut (11), Mehmet Şîrîn Ogut (8), Aycan Ogut (5), Cîhan Ogut (4) û Cînar Ogut (3) hetê leşkeran ra ameybî qetilkerdene. Versucê qetlîamî, Fermandarê Cendirmeyan Bulent Karaoglu, Fermandarê Bolukê Hêzanê Taybet ê Cendirmeyan ê Qezaya Dêrxasî Fermandar Hanefî Akyildiz, Mudirê Şubeyê Hezanê Taybet ê Emnîyetê Mûşî Şerafettîn Ûz û Fermandarê Qereqolê Cendirmeyan ê dewa Gokyaziya Dêrxasî Turhan Nurdogan bi serran ameyê muhakemekerdene labelê rixmê heme reaksîyonan zî demê cipersayîşî de nêameyê girewtene. Heta mehkema derheqê versucan de qerarê beratî da û mehkemaya berze zî Bulent Karaoglu ra vete, qerarê beratî yê derheqê Hanefî Akyildiz, Şerafettîn Ûz û Turhan Nurdogan de qebul kerd. Tewr peyên zî derheqê hedîse de qerarê “Vîyartişê demî” ame dayene û serê dewa ame girewtene.
Fermandarê Cendirmeyan dewijan tehdît keno
No hedîse kiştişê astsubayêkê yê pirodayîşêkoê herêma koyê Vakurê Kurdîstanî ra pey qewimîya. 2ê teşrîna verêne ya 1993 de mabênê gerîlayanê PKK û leşkeranê tirka de herêma koyî Vartînîsî deşer vejîyeno û nê şerî de astsubayêk yeno kiştene. Fermandarê Cendirmeyan ê Navçeya Dêrxasê Bulent Karaoglû demo ke cenazeyê astsubayî reyde mîyanê Vartînîsî ra vîyareno, erebaya xo ra yeno war û vano, “Ez do emşo na dewe biveşna, ez do dewe şima ser o birijna” û guleyan vera hewa dano û şono. Nêmeyê şewe dewe de bi beşdarîya hêzanê taybet, komando û bi seyan leşkeran dest pêkeno. Nê operasyonî de banê keyeyê Ogutî yeno veşnayene, dewijî meydanê dewe de yen3e komkerdene û goreyê daneyanê fermî yê Walîtîyê Mûşî, 8 hebî dewijî bi bahanaeyê “hetkarîya rêxistine kerdo” yenê destbendkerdene. Xeylê dewijî îşkence vînenê.
Serdozgerîya DGM’yî ya Amedî dewa padeno
Aysel Ogut demo ke banê înan yeno veşnayayene 17 serre bîya û a roje seba ke keyeyê datê xo de bîya, qetlîamî ra xelesîyaya. Aysel Ogut derheqê qetlîamî de gere kena la Serdozgerîya Pêroyî ya Mûşî qerar dano ke heqê ci çin o ke dewa akero û dosya Serdozgerîya Mehkemaya Ewleyîya Dewlete (DGM) ya Amedî rê erşaweno. Serdozgerîya Mehkemaya Ewleyîya Dewlete hedîse sey “kerdişêko terorîstî yo nedîyar” pênase keno û bêyî ke cipersayîşêko tesîrdar bikero, dewa padeno.
10 serrî ra pey dosya yena akerdene
Ney ser o serra 2003 de Aysel Ogut reyna gere kena û na reye cipersayîş yeno destpêkerdene. 10 serrî ra dosya yena akerdene. Demê hedîse de Fermandarê Cendirmeyan Bulent Karaoglu lke sey Fermandarê Cendirmeyan ê Dêrxasî (Haskoy) wezîfedar bi, Fermandarê Bolukê Hêzanê Taybet ê Cendirmeyan ê Qezaya Dêrxasî Fermandar Hanefî Akyildiz, Mudirê Şubeyê Hezanê Taybet ê Emnîyetê Mûşî Şerafettîn Ûz û Fermandarê Qereqolê Cendirmeyan ê dewa Gokyaziya Dêrxasî Turhan Nurdogan sey versuc ameyê muhakemekerdene.
Mehkema derheqê versucan de qerarê beratî da
Roniştişê dewa de ke riyê sebebanê ewleyî ra Kirikkale de 10ê hezîran 2015 de ameye kerdene, dozger mutlaya xo ya esas de bi bahaneyê “sebebê mergî yê riyê îhmalkerdişî ra” waştişê cezaya hepisî kerd. Dozger waşt ke seba her mergêko 25 serrî bi pêroyê 180î ra heta 225 serrî cezaya hepsî daye versucan. Labelê roniştişo diyîn ê 1ê adara 2016î de heme versucî bi bahaneyê “besnêbîyayîşê delîlan” ameyê beratkerdene. Avûkatanê Aysel Ogut vera qerarê beratî îtîraz kenê û dosya erşawenê mehkemaya berze. 26ê çeleya 2021î de Dayîreya Mehkemaya Berze ya 1. de erjnayîşê dosyaya îstînafî qerarê beratî derheqê versuc Turhan Nurdogan, Hanîfî Akyildiz û Şerafettîn Ûz de qebul kerd.
