Serekwekilê Gruba yê DEM Partî Sezaî Temellî derheqê averşîyayîşanê rojeve de meclîs de qisey kerd û vat: “Heyeto ke do şêro Girawa Îmraliyî ganî bilez bêro tesbîtkerdene.”
Serekwekilê Gruba yê Partîya Têduştî û Demokrasî ya Şaran (DEM Partî) Sezaî Temellî derheqê averşîyayîşanê rojeve de meclîs de eşkerayî daye. Sezaî Temellî Rojîn Kabaîşa ke Wan de bi hewayêko guman ameya kiştene la kiştoxê aye nêameyê cezakerdene ard vîrî û vat ke ganî kiştoxî bêrê dîyene û cezakerdene. Sezaî Temellî derheqê butçe û daneyanê TUÎK’î de nê çîyî vatî: “Butçeya aştî na ya: Herinda ke her serre se ra 10ê butçeyî çekan rê bêra xerckerdene, ganî a lazimtîyanê welatijanê ma yê astengdaran bêra abirnayene. Butçeya aştî ganî ciwanan rê çimeyan awan bikera. Herinda ke her serre se ra 13ê butçeyî faîz rê bêra abirnayene, ganî nê çimeyî cinîyan rê bêrê abirnayene. Ez hêvî kena ke ma emser butçeyêka aştî bivînê. Butçeyêka seba şarî. La eke wina nêbo, ma tîya ra îqtîdarî hişyar kenê. Ma do sey DEM Partî meydanan de butçeya aştî bipawê û têkoşînaê xo bidomnê.”
‘Girewteyê nêweşî rixmê rewşa înan a girane zî veranêdîyenê’
Sezaî Temellî dewamê qiseykerdişê xo de bale ant wezîyeta zîndanan ser o û vat: “Girewteyê nêweşî rixmê rewşa înan a girane zî nêyenê veradayene. Wexto ke Paketa Reformê Hukmî ya 10. ameya eşkerakerdene, derheqê girewteyanê nêweşan de yew telîmatname zî seba înan nêame viraştene. Paketa Hukmî ya 10. nêeşkaye çareserîyêk peyda bikero. Nika Paketa Hukmî ya 11. yena hêvîkerdene. Goreyê eşkerayîya Wezaretê Edaletî paketê dadî do dewam bikerê, 12 û 13 do dima ra vêjîyê. Paketanê Hukmî yê ke bi zîhnîyetê ‘ma senî eşkenê cezayanê giranan domanan ser o ferz bikerê’ nêyenê qebulkerdene. Hêvîya komelî na ya ke bi lez seba problemê zîndanan çareserîyêk bêro viraştene. Ganî kerdişê Komîteyê Rayberîya Çimdarî û Îdareyî yê Hepisxaneyî biqedîyê. Reyna sîstemê edaletî beno sebebê bêhuqûqîyan. Ma nê çîyan dosyaya Selahattîn Demîrtaşî de zî vînenê. Eke no sîstem bêro rastkerdene, Tirkîya do aştî û demokrasî xo destfîna.”
Sezaî Temellî persê “Komîsyon do şêro Girawa Îmraliyî yan nê?” rê wina cewab da: “Şîyayîşê komîsyonî yê Girawa Îmraliyî meseleyêka muhîme ya. Birêz Ocalan veng da rêxistina xo û gamî ameyê eştene. Ganî êdî telîmatnameyê qanûnî bêrê kerdene. Parlamento de komîsyonêk ameyo awankerdene ke dîyar bikero ke telîmatnameyê qanûnî ganî çi bibê. No komîsyon muzakereyanê zereyî keno. La lingêkê teberî yê nê muzakereyan zî est o. Şima do nê muzakereyan kam reyde bikerê? Şima do Birêz Abdullah Ocalanî reyde bikerê. Zaf asan o. Ganî no zaf lez bêro plankerdene. Heyeto ke do şêro ganî bêro dîyarkerdene. Bêguman waştişê ma seba heyetêko xurt o, heyeto ke temsîlîyetê her kesî bikero. Ma hêvî kenê ke partîyê bînî zî beşdarê na mesela bibê ke no proses biserûber rayra şêro. Çunke aştî seba ma hemînan baş a. Ameyoxê nê welatî heme çî ra ver, bi çareserîyêka demokratîke ya meseleya kurdî û aştî reyde girêdaye yo. Ez hêvî kena ke demêko kilm de heyetêk bêro awankerdene. La programêko dîyarkerde, nêameyo dîyarkerdene.”
Sezaî Temellî persê derheqê sloganê “Bijî Serok Apo” ke hetê cinîyanê ke rayra şîyêne meclîs de ame vatene ser o zî dîyar kerd ke no slogan waştişê azadîya fîzîkî ya Abdullah Ocalanî û heqê hêvîye yo û derheqê rexneyan de zî vat ke no xizanîya sîyasetî nîşan dano.
