Hêzanê Kede û Demokrasî yê Îzmîrî vera girewtişê wendekaranê ke seba ke bi Kurdkî govende girewtbî, reaksîyon mojna û wina vat: “Govenda bi Kurdkî suc nîya, nêbena maneyê girewtişî.”
Wendekarê Lîseya Anadolu ya Haldun Koşayî ke vîdeoyêk de bi Kurdkî deyîran vanê û govende gênê, dima riyê ê vîdeoyî ra dima hetê polîsan ra ameybê destbendkerdene. Wendekaran ra A.Y ameye girewtene. Hêzanê Kede û Demokrasî vera destbendkerdiş û girewtişî, vernîya Midurîyetê Perwerdeyî yê Neteweyî yê Şaristanê Îzmîrî de eşkerayî daye. Rayber û temsîlkarê rêxistinanê sîvîl û xeylê kesî beşdarê eşkerayî bîyê.
Nameyê Platformê ser o Îpek Karenfîl qisey kerd û da zanayene ke bi muzîkê Kurdkî girewtişê govende suc nîyo û govende nêbena maneyê girewtişê merdiman. Îpek Karenfîl vat ke bêyê agahîya keyeyî destbendkerdiş û girewtişê gedeyan vera heqanê gedeyan o.
‘Seba ma Kurd ê, ma gênê’
Dapîra A.Y, Guzel Bozkurt zî îfade kerd ke ê bi ziwan û kulturê wirzenê û ronişenê, wina bîyo û vat: “Çira wina kerd kênaya mi, çira kênaya mi eşta zere? Cayê kênaya mi mekteb o, cayê kênaya mi hetê maya xo yo. Çira wina kenê? Seba ma bi Kurdkî qisey kenê kênaya mi eşta zere. Ma ziwanê xo ra fekveradê? Ziwanê ma Kurdkî yo. Ma do ziwanê xo ra fekveranêdê. Ma gedeyanê erşawenê mekteb ke biwanê la ê gedeyanê ma ma ra gênê.”
