Şaxa SESê ya Amedê, Komeleya Pisporên Xizmeta Civakî û Komeleya Derûnnasên Mezopotamyayê têkildarî Roja Cîhanê ya Astengdaran gotin: “Divê em her roj ji bo mirovên astendar baldar bin. Bi civakekî demokratîk encax wekheviya tevahî mirovan dikare pêk were.”
Sendikaya Kedkarên Tendûristiyê û Xizmeta Civakî, (SES) a Şaxa Amedê, Komeleya Pisporên Xizmeta Civakî (SHUDER) û Komeleya Derûnnasên Mezopotamyayê (DER-MEZ) bi boneya 3yê Kanûnê Roja Cîhanê ya Astengdaran li avahiya SESê ya Ofîsê ya navçeya Yenîşehîrê civîna çapameniyê li dar xist. Li salonê pankarta “Haydar be, fêm bike, biguherîne” hat vekirin. Metna daxuyaniyê ji aliyê serokê SHUDERa Amedê Zeydîn Duran ve hat xwendin.
‘Dive em her roj ji bo mirovên astengdar baldar bin’
Hevserokê Şaxa SESê ya Amedê Mehmetnûr Ûlûs ewilî axivî û diyar kir ku ne tenê rojekî divê her roj mirovên astengdar li ber çavan werin girtin û wiha got: “Li her qadên cîhanê mirovên astengdar di nava gelek zehmetiyan de dijîn. Divê li her qadê ji bo kesên astengdar xebat werin kirin û jiyana astengdaran were hêsankirin. Divê em her roj ji bo mirovên astengdar baldar bin.”
‘Divê wekheviya welatiyan tenê li ser kaxezê nemîne’
Paşê jî Serokê SHUDERa Amedê Zeydîn Duran metna daxuyaniyê xwend. Zeydîn Duran diyar kir ku îro li Amedê û Tirkiyeyê welatiyên astengdaran di nava gelek pirsgirêkan de dijîn û got: “Ev pirsgirêk ne pirsgirêka kesî ye, sîstemtîk e. Xebatên xizmetguzarî ne gihiştbar in. Desthilat ji bo kesên astengdar peymanên navneteweyî îmze kirine lê em di pratîkê de dibînin ku erkên xwe pêk nayîne. Bi civakekî demokratîk encax wekheviya tevahî mirovan dikare pêk were. Divê welatiyên astengdar ji civakê neyên dûrxistin. Divê wekheviya welatiyan tenê li ser kaxezê nemîne.”
