Serokê Giştî yê TÎPê Erkan Baş piştî hevdîtina bi şandeya Îmraliyê re anî ziman ku ew aştiyeke mayinde ji bo azadî û demokrasiya rast weke şertekê dibînin. Pervîn Buldan jî diyar kir ku di merhaleya pêvajo gihîştiye de hewcehî bi qanûnên aştiyê heye.
Heyeta DEM Partiyê ya Îmraliyê di çerçoveya pêvajoya Aştî û Civaka Demokratîk de serdanên xwe yên li gel partiyên siyasî didomîne. Heyeta Îmraliyê piştî hevdîtina li gel AKPê, li Meclîsê serdana Partiya Karkeran a Tirkiyeyê (TÎP) kir. Endamên Heyetê Pervîn Buldan, Mîthat Sancar û endamê Buroya Hiqûqê ya Sedsalê Faîk Ozgur Erol bi Serokê Giştî yê TÎPê Erkan Baş û parlamenter Ahmet Şik re hevdîtin kirin.
Piştî hevdîtinê daxuyanî ji çapemeniyê re hat dayin. Di serî de Serokê Giştî yê TÎPê Erkan Baş anî ziman ku wan li ser xebatên komîsyonê, merhaleya pêvajo gihîştiyê gotobêj kirin û wiha got: “Em aştiyeke mayinde ji bo azadî û demokrasiya rast weke şertekê dibînin. Ji ber wê jî partiya me di destpêkirina pêvajoyê vir ve bi vê heşmendiyê em tevgeriyan. Desthilat dikare hesabên biçûk bike. Lê di vê pêvajoya dîrokî de ji bo pêşeroja hemû welatiyan ji bo karkerên kurd û tirk em dikarin çi bikin û çawa hemû welatiyên vî welatî dikarin mafê xwe bistînin li ser wê xebitîn.”
Pervîn Buldan jî bi lêv kir ku hevdîtineke pir erênî derbas bû û wiha axivî: “Me tiştên ku ji bo pêwîstiya pêvajoyê divê bên kirin li ser wê axivîn. Helwesta erênî ya TÎPê pir girîng e. Êdî pêvajo gihîştiye merhaleyekê. Di vê merhaleyê de hewcehî bi qanûneke aştiyê heye. Di vê pêvajoyê de hewcedarî bi piştgiriya TÎPê heye. Ji bo wê jî em spasiya heyeta TÎPê dikin.”
