Verfekê Resnayîşî yê HSD’yî Ferhad Şamî dîyar kerd ke Fermandarê Pêroyî yê HSD’yî Mazlum Ebdî do serrneweyî ra ver şîro Şam.
Verfekê Resnayîşî yê Hêzanê Sûrîya Demokratîke (HSD) Ferhad Şamî televîzyona Al Arabî rê qisey kerd ke merkezê ci Erebîstan de yo. Ferhad Şamîyî derheqê pêvînayîşanê mabênê Rayberîya Xosere ya Vakur û Rojhelatê Sûrîye û hukmatê demkî yê Şamî de qisey kerd.
Ebdî serrneweyî ra ver do şîro Şam
Ferhad Şamîyî dîyar kerd ke Fermandarê Pêroyî yê HSD’yî Mazlum Ebdî serrneweyî ra şono Şamî zîyaret keno û babeta entegrekerdişê HSD’yî ya artêşê Sûrîye de hemfikir ê û Şamî reyde nuqtayê hemparî est ê.
Ferhad Şamîyî xeberanê ke tayê sazgehan de ameyê weşanayene ke vanê HSD’yî eyaletê Siwêda de hêzê leşkerî yê Durzî perwerde kerdê, zûrî vetê û vat: “Ma hêzê Hîkmet El Hîcrî perwerde nêkerdê. Têkilîyê ma yê şarê Durzî reyde hem sîyasî hem zî astê şarî de yê. Tecrubeyê înan ê leşkerî est ê û lazimtîya înan bi perwerdeyîya leşkerî ya HSD’yî çin a.”
‘Tu têkilîya ma Îsraîlî reyde çin a’
Şamî derheqê îdiayanê têkilîya HSD û Îsraîlî de zî wina vat: “Tu tekilîya ma Îsraîlî reyde çin a. Eke têkilîya ma Îsraîlî reyde est bîyêne do tu kesî cesaret nêkerdêne ke hêrişê HSD’yî bikerdêne. Ê ke nê vatişan vila kenê, ê kesî ke wayîrê tu projeyêka neteweyî ya hîra ya Sûrîye nîyê.”
Ebdî: Dayîşûgirewtişê ma Şamî reyde qut nêbîyê
Fermandarê Pêroyî yê HSD’yî Mazlum Ebdî zî vizêr kombîyayîşê Heyetê Piştgirîya Muzakereyan de ke Tebqa de ame kerdene, qisey kerd û eynê çarçewa de qisey kerdbi. Ebdîyî vatbi ke ê girêdayeyê Peymana 10ê Adare yê û her çend ge-ge binpaykerdişî bibê zî dayîşûgirewtişê ma hukmatê demkî reyde qut nêbîyê û seba averberdişî cehdê înan est ê.”
