Merdimê Vîndîbîyayan û şaxê ÎHD’î yê Amedî vera vewre û cemedî zî hewteyê 882. de çalakîya xo dewam kerde û aqûbetê Fethî Yildirimî persayê. Çalakîye de ame waştene ke kiştoxê Fethî Yildirimî bêrê eşkerakerdene.
Merdimê Vîndîbîyayan û Şaxê Komeleya Heqê Merdiman (İHD) yê Amedî vera vewre û cemedî zî hewteyê 882. de çalakîyê “Wa vîndî bêrê vînayîşî faîlî bêrê mahkemekerdene” verê cayê Heqanê Merdiman yê Parka Koşuyolu ame viraştene. Rayberanê ÎHD’î Merdimê Vîndîbîyayan, temsîlkarê rexistinanê sîvîlan tewrê çalakîye bîyê û resmê vîndîbîyayan berz kerdê. No hewte aqûbetê Fethî Yildrimî yo ke 4ê çileyê 1994î de Weranşar de amebî vîndîkerdene ame persayene.
‘Wa serra newîye bibo serra heqanê merdiman’
Verê wendena eşkerayîye Serekê ÎHD’î yê Amedî Ercan Yilmaz qiseyê xo de balê ante serê çalakîyanê dergûdila yê vîndîbîyayan. Ercan Yilmazî serrneweye pîroz kerd û wina vat: “Wa serra newîye bibo serra aştî, demokrasî û heqanê merdiman. İktidarî hema zî aqûbetê vîndîbîyayan dîyar nêkerda. Eke ma meseleya kurdan qiseykenê ganî verî faîlê vîndîbîyayan bêrê eşkerakerdene. Ma xeylê kiştoxan naskenê seba ma zehmetîyê ke pîla, çike ayê ke kiştoxê cuya xo bi rehetî dewam kenê.”
Meymanîye de ameyê destbendkerdene
Metnê hîkayeyê vîndîbîyayîşê Fethî Yildirimî hetê Rayberê ÎHD’î Firat Akdenîz ra ame wendene, û wina vat: “Fethî Yildirim 4ê çileyê 1994î de keyeyê xo ra vatbi ‘hevalê ey Abdo Mutlu ke Almanya de cuyeno ameyo Wêranşar û o bi Alî Kuran û Nacî Kapancilar do şorê keyeyê Mutlu.’
Demoke uca manenê, hêzê girêdayê Mudirîyetê Polîsan yê Wêranşarî eşt keyeyî înan ser, Alî Kuran, Nacî Kaplancilar û Fethî Yildirim û meyman Abdo Mutlu reyde ameyê destbendkerdene. Eynî roje de saete 23.00 de Alî Kuran telefonê Silêman Yildirimî keno û vano ke ‘ma ameybî destbendkerdene, bê Fethî Yildirimî ma heme ameyê veradayîş.’ Badê ey rojan ti xebere nê ameya girewtene.”
Peynîyê çalakîye de seba vîndîbîyayan çalakîyê roniştene ame kerdene.
