Platforma Saziyên Demokratîk a Amedê li dijî êrişên çeteyên girêdayî HTŞê û Tirkiyeyê yên li taxên Şêxmeqsûd, Eşrefiyê û Benî Zêd meşeke girseyî li dar xist. Hevserokê Giştî yê DBPê Keskîn Bayindir pêvajoya 2013 û 2015an bi bîr xist û got: “Hesaba şaş çawa ku Kobanî vegeriya, dê Helebê jî vegerê.”
Êrişên komên çete yên girêdayî Hikûmeta Demkî ya Sûriyeyê û Tirkiyeyê yên li dijî taxên Şêxmeqsûd, Eşrefiyê û Benî Zêdê bênavber didomin. Hêzên Ewlekariya Hundirîn yên Helebê bersiv didin êrişên çeteyan. Heta niha di êrişên çeteyên girêdayî Hikûmeta Demkî ya Sûriyeyê û Tirkiyeyê de 8 kes jiyana xwe ji dest da. Li dijî êrişên êrişên çeteyên girêdayî HTŞê û Tirkiyeyê Plarforma Saziyên Dekmokratîk li Amedê meşeke girseyî li dar xist. Girse li Parka Koşuyoluyê heta AZCê Plazayê ya li Semta Ofîsê meş li dar xist. Di meşê de dirûşmên “Bijî Berxwedana HSD”, “Bijî Berxwedana Şêxmeqsûd, Eşrefiyê” hatin berzkirin. Di meşê de pankarta “Xwedî derketina Rojava xwedî derkatina mirovahiyê ye”hat vekirin. Hevserokên giştî yên DBPê, Hevşaredarên Amedê, parlamenterên DEM Partiyê yên hêrêmê, endam û nûnerên saziyên civakî, Hevserokên DEM Partiyê yên navçeyên Amedê û gelek welatî tev li meş û daxuyaniyê bûn.
Dema ku girse hat li pêşiya Plazaya AZC Plazayê daxuyanî hat dayîn. Hevserokê Giştî yê DBPê Keskîn Bayindir di daxuyaniyê deaxivî.
‘Em van êrişan şermazer dikin’
Keskîn Bayindir axivî û diyar kir ku ev 3 roj in rejîma Sûriyeyê êrişî Rojava dike û got: “Bi sedan birîndar û dehan kuştiyên me hene. Em li bakurê Kurdistanê van êrişan şermazer dikin. Em îro li Kurdistan û Tirkiyeyê li ser piyan e. Ev nîşaneya berxwedan û serkeftine ye. Em dizanin ku amadekariya vê êrişê heye. Ew kesên ku di pêvajoya 2013 û 2015an de alîkarî da DAÎŞê îro alîkarî dide HTŞê. Lê çawa ku li Kobaniyê DAÎŞ tek çû dê HTŞ jî tek biçe. Çawa ku di pêvajoya 2015an de DAÎŞ kirin hincet û pêvajo xira kirin û îro jî bi HTŞê dixwazin pêvajoyê xira bikin.”
‘Hesabê şaş ji Kobanî vegeriya dê ji Helebê jî vegere’
Keskîn Bayindir diyar kir ku êrişên li ser Şêxmeqsûd, Eşrefiyê, Benî Zêdê tê wateya êrişên li ser Amedê û wiha got: “Gelê Kurd jiyaneke koledarî qebûl nekiriye, dê îro jî qebûl nakê. Îro li Amedê û tevahî bakûrê Kurdistanê ji bo Rojava li ser piya ye. Bi ferasta HTŞê tu pêşeroj ji Sûriyeyê re tune ye. Bi sedan milyon kes heta dawiyê piştgirî didin Rojavayê. Hesaba şaş çawa ji Kobanî vegeriya dê ji Helebê jî vegere. Heta ku çeteyên HTŞê paş ve vekişin, em ê li ser piyan bin.”
