Welatijanê ke Pirsûs de tewrê çalakîya seba piştgirîya Rojava bîyê, dîyar kerd ke ê aştî wazenê û rixmo ke dewlete seba aştî gaman bierza, paştî dana hêrişanê vera Rojava û vat: “Şarê kurdî vera hêrişanê Rojava werişto lingan ser. Heta peynî ma Rojava reyde yê û piştgirî dane uca.”
Platformê Sazgehanê Demokratîk ê Rihayî seba ke piştgirî bidê Rojava û hêrişanê çeteyanê HTŞ û SMO’yî şermezar bikerê qezaya Pirsûs ya Rihayî rayîrşîyayîşêko girseyî viraşt. Welatijê ke tewrê rayrayîşî bîyê ajansê ma rê qisey kerd û nerazîbîyayîşê xo vera hêrişanê destkewteyanê Rojava mojna.
‘Ma do Rojava bipawê’
Dayîka bi nameyê xo Gulîzar Ozturk dîyar kerd ke ê vanê hêriş û şerî rê êdî bes o û vat: “Xeylê kesî cuya xo vîndî kenê, zerrîya dayîkan veşena. Dewlete vana aştî la hema zî hêrişê vera Rojava dewam kenê. Cayêko seba aştî gaman bierzê hêrişê şarê kurdî kenê. Her çend şino hêvîya ma yê seba aştîye bena kêmî. Ganî vera hêrişanê Rojava ma xover bidê. Heta peynî ma seba pawitiş û destkewteyanê Rojava xover bidê.”
‘Şaro Kurd û ‘Birêz Abdullah Ocalan aştî wazeno’
Dayîka bi nameyê Aslihan Çîftçî zî dîyar kerd ke Abdullah Ocalan rayîrê aştî dayo vernîya şaran û wina vat: “Ma pey rêça Rayberê xo yê la dewlete hema zî gamêk nêeşta. kurdî kamca de biciwiyê ewro binê tehlukeyê qetlîamî de ye. Ma nê hêrişan şermezar kenê. Kêna û xortê ma yenê kiştiş. Êdî bes o, wa şarê kurdî vera nê hêrişan wirzo we. Şarê kurd û birêz Abdullah Ocalan aştî wazenê.”
‘Ma wazenê Rojava azad biba’
Welatijo bi nameyê Kanber Doymazî îfade kerd ke no seserrî ra zêdeyêr o ke hêrişê şarê kurdî kenê û vat: “Ma hêrişanê vera Rojava şermezar kenê. Ma wazenê Rojava azad biba. Nê hêrişê serê Rojava bi destê Erdoganî yenê kerdene. Ganî şarî kurdî vera hêrişan wirzo we. Heta peynî ma do xover bidê.”
‘Ma do vengê Rojava berz bikerê’
Muhammed Kaçmazî dîyar kerd ke ê seba Rojava rayîrşîyayîş kenê vat: “Ma do bibê vengê Rojava. No çend hezar serrî yo şarê kurdî yeno kiştene. Ma do seba Rojava wirzê lingan ser o. Ma do seba Rojava rayîrşîyayîş û çalakîyan bikerê. Ma do piştgirî bidê şarê Rojava û vengê Rojava berz bikerê.”
