Endamê HPGê Rojhat Amed ê ku li navçeya Sûrê jiyanan xwe ji dest dabû, bi pêşengiya MEBYA-DER û malbatê li ser gora xwe bi girseyî hat bibîranîn.
Bi pêşengiya Komeleya Piştevanî û Alîkariyê ya Malbatên di Dergûşa Şaristaniyê de Xizmên Xwe Winda Kirine (MEBYA-DER) li goristana navçeya Rezanê ya Amedê serdana gora endamê HPGê Rojhat Amed (Gunduz Akmeşe) ku di 16ê Çileya 2016an de li Sûrê jiyanan xwe ji dest dabû, kirin. Endam û rêveberên MEBYA-DERê û gelek kes beşdarî bîranînê bûn. Bîranîn bi deqîqeyek rêzgirtina ji bo kesên ku di têkoşîna azadiyê de jiyana xwe ji dest dane destpê kir. Piştî rêzgirtinê girseyê dirûşmeya “Şehîd namirin” berz kirin.
‘Em ê têkoşîna xwe mezin bikin’
Hevseroka MEBYA-DERê Gurbet Sevîktek di bîranînê de axivî û got: “Em ê her tim xwedî li bîranînên şehîdên xwe derkevin. Her tim mîmarên têkoşîna me ew in. Em bi saya têkoşîna wan û keda malbatên me hatine heta vê rojê. Heta ku Rêber Apo û hemû gelên bindest bigihêjin azadiya xwe em ê têbikoşin. Em careke din soza xwe ya girêdayî wan tînin ziman û em ê têkoşîna xwe mezin bikin.”
