Merkezê Resnayîşî yê HSD’yî eşkera kerd ke rixmê adirbesto ke ameto parekerdene zî grûbê rejîmê Şamî hêrişê Eyn Îsayî kenê. Sewbîna ame dîyarkerdene ke derûdorê Hepisxaneyê El-Aktanî de zî mabênê şervananê HSD û grûbanê rejîmê Şamî de pirodayîşê giranî qewimîyenê.
Grûbê çete ê girêdayeyê HTŞ û Tirkîya rixmê adirbesto ke ameyo parekerdene zî hêrişanê xo domnenê. Verfekê Merkezê Resnayîşî yê Hêzanê Sûrîya Demokratîk (HSD) Ferhad Şamî hesabê xo yê X’î bi eşkerayîyêk bale ant hêrişanê grûbanê çete ser o. Ferhad Şamîyî dîyar kerd ke rixmê adirbestî zî hêriş û pirodayîşî vêşî benê û vat: “Eyn Îsa, Şedadî û Reqa de hêrişê grûbanê çete vera hêzanê ma bi giranî dewam kenê.”
‘Cehd kenê ke girewteyanê DAIŞ’î veradê’
Ferhad Şamîyî eşkera kerd ke grûbanê çeteyan bi amancê serbestveradayîşê çeteyanê DAIŞ’î hêrişê Hepisxaneyê El-Aktan kenê û wina vat: “Nê hepisxaneyan de bi seyan çeteyê DAIŞ’î yenê girewtene. Eke nê grûbî biresê hepisxaneyî û çeteyan serbest veradê do rewşêka ewleyî ya bi tehluke vejîya orte. Na rewşe ra hêzê hêrişkar û paştgirê înan berpirsîyar ê.”
Ferhad Şamî bale ant tehlukeyê veradayîşê DAIŞ’ijan ser o û derheqê ney de raya pêroyî îqaz kerd û vat: “Eke hêrişî dewam bikerê û çeteyê DAIŞ’î bêrê verdayene, heme hêrişkar û hêzî ke paştî danê înan, berpirsîyar ê.”
