Şarê Sengeser û Warmawayî vera hêrişanê qirkerdişî yê çeteyanê HTŞ û SMO’yî yê Rojavayê Kurdîstanî ser o vejîyayê waran û paştîdayîşê xo seba Rojava dîyar kerd.
Bi hezaran welatijan qezaya Warmawa ya Silêmanîye de seba paştîdayîşê Rojava vejîyayê waran û hêrişî şermezar kerdê. Çalakîyî Warmawa de çalakîker Sefer Ebûbekîrî qisey kerd û vat ewro ê seba paştîdayîşê xoverdayîşê Rojava kom bîyê û wina dewam kerd: “Ez heme şarê Başûrî ra wazena ke seba Rojava vejîyê waran. Ez waştişê vindarnayîşê nê zilmî kena.”
Bi hezaran welatijan qezaya Sengeserî de zî bi eynê amancî çalakî viraşte. Mîyanê bazarê Sengeserî ke îdareyê Raperînî de yo, çalakîyêka paştîdayîşê ameye viraştene. Qiseyan de ame vatene ke bi hezaran çeteyî hetê hukmatê Colanî ra ameyê veradayîşî û vat: “No zî tehlukeyêko gird o seba Îraqî.”
