Hemserekîya Konseya Îdareyî ya KCK’yî beyanatêk weşana û dîyar kerd ke warardişê Beyreqa Komara Tirkîya yê sînorê Tirkîya-Sûrîye provokasyon o.
Beyanatî de ame dîyarkerdene: “Roja ke Rojawan de hêrişê îşxal û bêkurdkerdişî yê çeteyanê HTŞ’yî yê bi piştîya Tirkîya dewam kenê, no provokasyon bale anceno. Hêrişê ke mîyanê sînorê Sûrîye de vera kurdan yenê ramitene eynî wext de seba zerardayîşê prosesê haştîye û komelê demokratîkî yê ke Rayber Apo bisebir wazeno biresno peynî. No provokasyonê beyraqe sey dewamê nê saboteyî aseno.”
“Badê warardişê na beyraqe beyanatê berpirsîyaranê hukmatî, dayîşê na serebûde yê çapemenîye şovenîzmê dişmenê kurdan berz kerd. Bi destekê nê provokasyonî dişmenîya kurdan berz bîye. Atmosferêk de ke dişmenîya kurdan hende berz bîya senî mumkun o ke prosesê haştîye û komelê demokratîkî aver şêro?”
“Badê nê provokasyonî hedefgirewtişê DEM Partî zî mojneno ke no provokasyon sey beşêkê yew komployî virazîyaya yan viraznîyaya. Eke Tirkîya de provokasyonêk virazîyo wasiteya tewr tesîrkare tim beyraqe bîya.”
“Ma sey Têgêrayîşê Azadîya Kurdî tim hêrişê beyraqan yan nirxanê bînan şermezar kerd. Rayber Apoyî zî tim bale ante ke o vera nê tewir çîyanê Beyreqa Komara Tirkîya yo û hurmetê nirxanê şarê Tirkîya keno. Dewleta tirke û beşê sîyasî yê Tirkîya zî vindertişê ma zanê. Coka fehm beno ke badê nê provokasyonê beyraqe hedefgirewtişê Têgêrayîşê ma, DEM Partî û kurdan seba armancêk virazîyayo.”
“Eşkera yo ke badê nê provokasyonê beyraqe şarê kurdî û hêzê sîyasî ameyî hedefgirewtene. Nê têgêrayîş û weşanayîşî teqez armancêk mojnenê. No têgêrayîş mojneno ke qala wayûbiratîya tirk-kurdan a îqtîdarî bêmana ya.”
“Wa şarê ma sey tim vera nê tewir provokasyonan hîsgir bo. Raya Pêroyî ya Tirkîya zî ganî vera nê tewir serebûdan biwijdanîye hareket bikero û armancê înanê ke wazenê provokasyon bikerê, veng vejo.”
