Îngîlîstan de sîyasetmedar û sazgehanê kurdan derheqê hêrişanê vera Rojava de bi kampanya û cehdanê dîplomatîkan, hukmat, parlamento û Wezaretê Karanê Teberî rê vat “Paştî bide Rojava.”
Grûba “Kurds for Labour” ke sîyasetmedarê kurdan ê Partîya Karkeran ra awan bîya, Wezaretê Karanê Teberî rê mektûbêko hîra erşawit. Mektûbî de ame vatene ke eke ewro Qralîya Yewbîyaye hîna ewle ya, no rasterast bi saya xoverdayîşê şervananê kurdan o. La ame hîşyarkerdene ke endamê verênî yê DAIŞ’î binê nameyanê cîyayan de reyna rêxistin benê û no hem herême hem zî Ewropa rê tehdîtêko rasterast virazeno.
Parlemanteran ra Wezaretê Karanê Teberî rê mektûb û persî
Parlemantera kurd û elewî ya Partîya Karkeran Feryale Clark Demîrcî, Wezaretê Karanê Teberî rê pers û mektûb erşawit. Demîrcî bale ante ke ganî bilez seba hetkarîyanê însanîyan rayîr bêro akerdene
Parlemantera bîne Dr. Rupa Huq zî derheqê temsîlîyetê şarê kurdî yê mîyanê hukmatê Sûrîye de persê nuştekî erşawitê Wezaretê Karanê Teberî rê.
Kampanyaya Mektûbî ya sazgehanê kurdan
Kurdish Progress û Meclîsê Şarê Kurdî kampanyaya bi nameyê “Stop Attacks on Kurds in Northern Syria / Hêrişanê vera Kurdanê Rojava Vindarnê” daye destpêkerdene. Kampanya de yeno waştene ke hêrişê vera sîvîlanê kurdan cade bivinderê, hetkarîya însanîye ya bileze herême rê bêra erşawitene, çimdarê mîyanneteweyî yê bêhetî bêrê erşawitene û Sûrîye de têkilîya Qralîya Yewbîyaya ya ewle û temsîlîyetê sîyasî yê kurdan vernî de bêro destgirewtene.
Kampanya netîce dana
Parlamentera Partîya Karkeran Catherine West ke cewabê mektûban ke çarçeweya kampanya de ameyê erşawitene da, bale ante cehdanê hukmatî yê pawitişê adirbest, pawitişê sîvîlan û erşawitişê hetkarîya însanîye ser o.
