Hemşaredar û endamanê meclîsê şaredarîyanê DEM Partî ê Amedî meaşê xo yê aşmêke seba piştîdayîşê kampanyayê hemgirewtene yê seba Kobanî amebî destpêkerdene bexş kerd.
Piştgirîyê hetkarîya merdimî seba Rojava bê mabên dewam kena. Platformê Pawitene û Hemgirewtene yê şaristanê Amedî çarçeweyê seferberîyê hetkarîya însanî de “Kampanyaya Hetkarî yê Merdimî ya Lezabez seba Kobanî” dabî destpêkerdene. Çarçeweya kampanya de hemşaredar û endamê meclîsê şaredarîyanê DEM partî yê Amedî Merkezê Kongreyî ya Çand Amedî de kom bîy. Hemşaredarê şaristanê girdî yê Amedî Dogan Hatun, hemşaredarê qezayan û endamê meclîsan tewrê kombîyayîşî bîy. Kombîyayîş de hemşaredaran qerar da ke meaşê xo yê aşmêke do bexşê Kobanî bikerê. Sewbîna endamê meclîsan zî tewrê nê kombîyayîşî bîyê û meaşê xo bexş kerd.
‘Bêrê ma nê adirî bitefnê’
Hemşaredarê Şaredarîya şaristanê girdi Dogan Hatunî kombîyayîş de qisey kerd ke pêroyê Rojhelatê Mîyanênî zereyê çemberê adirêko girdî de yo û vat: “No adir serê de amanc keno ke kurdan bivêşno. Ma kurdî vera no adiro ke Rojhelatê Mîyanên de ro zê aweyîme. Ma do heme adiran bitefnê. Şarê bindestî yê Rojhelatê Mîyanênî bibê sey şarê kurdî, bêrê ma heme têdir nê adirî bitefnê. No adir ewro şer o. La ma wazenê sey awe bi rûmet û azad biciwîyê.”
‘Zerrîya ma yewa gonîya ma yewa’
Dogan Hatun vîr ard ke şaristanê Kobanî binê dorpêçê çeteyanê HTŞ’yî de yê û vat: “Heta awe şimitene ra bigê elektrîkê şarê kobanî ameyo birnayene û wazenê şarî bi serd bikişê. Heta ke şarê ma yê Kobanî û pêroyî herême zor û zehmetî ra bixelesiyo ma do heme çalakîyanê xo de piştidayîş bikerê. Şarê ucayî heme bira, maye, pî û embazê ma yê. Zerrîya ma yew a gonîya ma yew a.”
‘Şima adir bê ma zî awe yê’
Hemşaredar Hatunî dîyar kerd ke înan kombîyayîş de qerar girewto û vat: “Ma na aşmê heme meaşê xo danê şarê Kobanî. Bi nê pereyan ma înan rê awe, şit, cilan seba gedeyan û lazimatîyanê bînan bigîrê. Wa hêzê hegomonîkî bizanê ke ma kurdî serê de seba xo û seba heme şaran azadî wazenê. Ma şer nêwazenê. Ê yê ke wazenê ma bikişê wa bizanê ke; eke şima adir bê, ma zî awe yê. Ma do xover bidê, ma do nêverdê gedeyî serdan ver bimirê. Ganî her kes, bi taybetî zî şarê ma hişyar bo. Na komployêka mîyanneteweyî û pêroyî ya. Ganî ma verva na komploye wirze we. Ma kişta şarê xo de yê û ma verva şerî yê.”
