Platformê Ked û Demokrasîyî yê Dêrsimî, wayîrvejîyayîşê Rojavayî ser Meydanê Sey Rizayî de ameyî pêser. Seweta Rojavayî çilayî vesnayî.
Sûrîye de Çeteyê ke giredayeyê hukmatê demkî û dewleta tirkeyê xêylî waxto ke hêrişê elewî, durzî û kurdan kenê. Hewtê ra zêdêrîyo ke dormeyê kobanî çarno û hêrişê qirkerdişî kenê. Çar parçeyê Kurdîstanî, Kurdê dinya û dostê kurdan vera nê hêrîşanê wahşîyan nêrazîbîyayena xo nişan danê. Platformê Ked û Demokrasî her firset de nêrazîbîyayena xo nişan dano. Ewro reyna no dane şanî meydanê Sey Rizayî de ameyî pêser û seba rojanê rindan çilayî veşnayî.
Hemserekê Platformê Ked û Demokrasî Ozcan Ateşî qiseykerdişê xo de wina va: “Çewerê sîndorê Murşîtpinarî yakerê. Sarê Rojavayî teyna nîyo. Ma seveta sarê Rojavayî çilayan vesnenîme, lewê qomê xoderîme.”
‘Çeverê sindorî yakerê’
Partîya Kedî ra Orhan Kurul zî sere akerdena çeverê Murşîtpinarî vindert wina va: “Rojava de, domanan cinîyan qir kenê. Çeverê sindorî yakerê. Qorîdorê însanîye ke ya nêbî qomê ma xeylî heşîrîye de maneno. Berîme pêser, poştî bîderîme Rojava.”
‘Venge xo aştîye ser berz keme’
Wekîla Dem Partîye yê Dêrsimî Ayten Kordu ye zî qiseykerdîşê xo de, teynanêbîyayîşê Rojavayî ser vinerte û wina va: “Sûrîye de, xeyle waxto ke planê qirkerdene virazîye virazînê. Verê ci, Elewî û Dûrzî amey kîştene. Sarê Rojavayî xeyle serîyo ke, zerê xo de qomê xo ra pîya mîyanê aştîye û biratîye ser weşîye xo ramitêne. Kam sepkero bikero,Rojava peyser nêcêreno. HTŞ poştî cenoke nê cengî virazeno. Dewletê emperyalîstî vazenê ke Rojhelatê mîyanênî dizany bikerê. Dewleta tirke piştî dana HTŞ û ÎŞID’î. Polîtîkaya Dewlete Tirke raştîye ser nêsona. No qirim ma Dêrsim de kî dî, nika Rojava de vînenîme. Kam ke hetê rindîye û aştîye de ro gerê hetê Rojavayî de vindêro.”
