Hetkarîya ke hetê Platformê Pawitiş û Piştîdayîşê Şaristanî yê Amedî ra seba Kobanî amebi erşawitene, no 4 rojî yo rîyê astengîyanê Tirkîya ra sînorê Pirsûsî de ameya dorpêçkerdene. Platformî vera helwêstê Tirkîya reaksîyon mojna û dîyar kerd ke îhtîmalê herimîyayîşê xidayan vejîyayo orte.
Platformê Pawitiş û Piştîdayîşê Şaristanî yê Amedî seba Kobanî hetkarîya merdimî kom kerdbî û 4 rojî ra ver ver bi Kobanî na hetkarî kewtbî rayîr. Hetkarîya ke 25 TIRan ra yena pê sînorê Pirsûs û Riha de hetê leşker û polîsan ra ameya vindarnayene. TIRan de ke kelûpelê lazimtîyê merdimî, şit û çîyê werdî hema zî eyn ca de yenê astengkerdene. TIRî no 4 rojî yo eyn ca de hetê leşker û polîsan ra ameyê dorpêçkerdene. Demo ke xebatkaranê çapemenî waşt ke fotografanê TIRan biancê zî hetê leşkeran ra ameyê astengkerdene.
Îhtîmalê herimîyayîşê xidayan est o
Endamê Platformî, rêxistin û parlamenterê DEM Partî yê Rihayî zî cayo ke TIRî ameyê dorpêçkerdene, uca de vinderte yê. Heyetê hetkarî paweno ke berê sînorî bêro akerdene. Rayedarê platformî vera vindarnayîşê TIRan reaksîyon mojna û dîyar kerd ke îhtîmalê herimîyayîşê xidayan est o.
