Parlamenterê DEM Partî yê Agirî Sirri Sakik çalakîya seba Rojava de qisey kerd û bale ant tekoşîno ke Rojava de yeno dayene û vat: “Têkoşînê Rojava seba heme merdimîye yo.”
Platformê Sazgehanê Demokratîk Agirî de çarçewaya 1ê Sibate Roja Piştîpêdayîşêya Rojava ya Dinya de Agirî de rayîrşîyayîşêk kerd. Girseyo ke Kuçeyê Tahîr Elçî de kom bi, bi pankartê “Rojava xeta me ya sor e” heta Kuçeyê Cumhurîyetî rayra şi. Pêroyê rayîrşîyayîşî de sloganê “Bijî berxwedana Rojava” ame vatene. Parlamenterê DEM Partî yê Agirî Sirri Sakik û Necla Demîr, endam û rayberê partîyanê sîyasî, temsîlkarê sazgehanê sîvîl û welatijî beşdarê çalakî bîyê.
‘Cîhadîstî bîyê belayê sereyê dinya’
Rayîrşîyayîşî ra pey parlamenter Sirri Sakik sîyasetê teberî yê hukmatî rexne kerd û vat: “Şima do seba Filîstînî hesiran birişnê la demo ke dore yena kurdan şima do paştî bidê cîhadîstan. Ê cîhadîstî bîyê belayê sereyê dinya. Labelê şar û ciwanê kurdî Rojava û Kobanî de seba merdimîye bedêlê girdî dayê. Zafêrê 10 hezar ciwananê kurd cuya xo vîndî kerd ke dinya zilm û pirodayîşan ra azade biba. No xoverdayîş seba heme merdimîye yo. Têkoşînê Rojava seba heme merdimîye yo.”
‘Xoverdayîş dewam keno’
Parlamenter Nejla Demîr zî hêrişê vera Rojava şermezar kerdê û vat: “Rojava vizêr xover da ewro zî xover dano. Ma hêrişanê lêmin ê vera Rojava şermezar kenê. Bi peymana ke di rojî ra ver herême de ameya îmzakerdene, şer vindert, gedeyî êdî nêmirenê û şarê Rojava boya xo da. No xoverdayîş do bi qerardarî seba pawitişê destkewteyan dewam bikero.”
Hemserekê DEM Partî yê Agirî Serhat Yilmaz Korogluyî zî qiseykerdişêk kerd û bale ant sîstemê Rojava ser o.
Dimayê qiseykerdişan çalakî bi vatişê sloganan qedîyaye.
