Şaîr Hekîm Sefkan bi şîîra xo ya bi nameyê, “Ev Birîn Kevn e” bale ant bêbextîya hêzanê mîyanneteweyî ya vera Rojavayê Kurdîstanî ser o.
Şaîr Hekîm Sefkan seba ke bale bianco xiyanet û bêbextîya ke vera Rojavayê Kurdîstanî ameya kerdene ser o şîîra bi nameyê, “Ev Birîn Kevn e” tewrê klîbê ci amade kerd. Hekîm Sefkan vatişanê şîîre de bale anceno pêroyê tarîxî ser o ke xiynetê ke bi destê hêzanê dinya kurdan rê ameyê kerdene. Klîb hesabanê platformanê medya dîjîtal ê Med Huner yanî Med Muzîk TV ser o ame vilakerdene.
Hekîm Sefkan kam o?
Hekîm Sefkan serra 1970î de şaristanê Amûdê yê Rojava de maya xo ra beno.
Nuştoxê bi desan deyîranê namdaran o. Sey nimûne: “Ey Şehîd (Xelîl Xemgînî vata), Roj Baş Gerîla (Beser Şahîn vata), Ez Şehîd im Pakrewan im (Comerî vata), Sirûdê 15ê Tebaxe (Koma Berxwedan vata) Dîrok” şîîrê Hekîm Sefkan ê.
Di kitabê şîîran ê Hekîm Sefkanî çap bîyê û hîrê kasetê ey est ê. Nameyê kitaban “Bîstikek Tije Sal” û “Xwedana Siye” yo.
Vatişê şîîre wina yê:
‘EV BIRÎN KEVN E’
“Ev birîn ne ya vê rojê ye
Lê ev çiye ku qamuş nagire
Ev xencera di pişti min de
Cêwiyê rûreşiya dîrokê ye
Ev kêrên ku pêsîrên min parçe dikin,
Zingara wê ji nav qîlên Asanayê maye
Ev birîn kevn e kevn
Benên di stûyê min de bi bêhna kalên me hatiye şûştin
Hîn bêhna Şêx Seîd, Seyîd Riza û Şêx Abduselam ji van benan tê
Ev birîn kevn e kevn
Ne ya vê rojê ye.
Û Deniz û Barîn. Berdewama tazîjinên Dêrsimê ne
Û Kobanî wêneyê rengin ê Geliyê Zîlan e
Em ji rengên eşên xwe
Ji mezinbûna birînên xwe
Kujerên xwe jî nas dikin
Ev birîn kevn e kevn
Giyanê ku we li Agirî binax kir
Hêrsa ku we li Dêrsimê vemirand
Zarokên ku di Enfalê de bisaxî binerd kirin
Her şev mêvanên xewnên we ne
Loma hûn har û hov in
Û em jî serhişkin
Ev çi kîne
Ku xwîn ji nava diranên we diherikin
Ev çi dunyaye ku bûye mazata deyûzan
Ev çi civak û sazî û derewin.
Mîna keriyên genan
Artêşên guran in
Kaxetên we niviştên vala ne
Bangên we qeb-qeba kewan in
Xefk in xefk
De kaxetên we serên we bixwin
De civakên we di bin erdê kevin
Kîjan nivişta we pîrhebokên êrişkar wenda kirin
Kîjan xaçên we vampîrên har rawestandin?
De hiş bin
Kerr bin ku hûn kerr in
Mîna ayetên xwe kerrin
Mîna pirtûkên xwe
Mîna xaç û mizgeftên xwe kerr in kerr
Kîjan gef û bangên we bedenên bûzgirtî yên zarokên Kobaniyê germ kirin?
Ne hûn bin ne perlaman û civakên we bin
Ne hûn bin û ne ayet û niviştên we bin
Ev birîn kevn e kevn
Ev xencera di pişta min de
Cêwiyê rûreşiya dîrokê ye
Ev kêra li ser stûyê min
Doxa wê ji darê zilma we ye
Hesinê wê karê we ye
Û qesab şagirtê we ye
Lê ev ax fêrî razanê nebûye
Û wê nehêle hûn jî razên”
