Pêşnîyaznameyo ke netîceyê munaqeşeyanê 10ê sibate yê Parlementoyê Ewropayî yê hêrişanê Hukmatê Demkî yê Sûrîye yê Rojavayê Kurdîstanî ser o vejîya, ewro do seba ci rayî bêrê dayene. Pêşîyazname pêşnîyaz keno ke heme hetkarîyê ke Yewîya Ewrop dana Sûrîye, bi şertê dayîşê heqanê bingheyîn ê kurdan û kêmneteweyanê bînan reyde bêrê girêdayene.
Parlementoyê Ewropayî 10ê sibate de derheqê averşîyayîşanê Sûrîye û hêrişanê grûbanê Hukmatê Demkî yê vera Rojavayê Kurdîstanî ser o roniştişêk kerd. Ronîştişî de hêrişê ke 6ê çeleyî ra heta nika yenê kerdene ameyî erjnayene û rexneyê huşkî rayedaranê Yewîya Ewropa rê ameyê kerdene.
Parlementera bi eslê xo erebe Abber Al-Sahlanî kincê kurdan xoradaybî û ronîştişî de bale ante bedêlanê giran ke kurdan dayê. Al-Sahlanî bi vatişê, “Êdî rolî vurîyayî, kurdê ke yew wextî azadîya ma pawitêne, nika paweyê hetkarî yê” vengda parlementoye. Parlementeranê ke qisey kerd bale ante heqanê şarê kurdî û kêmnetewan ser o, waştbi ke ablûkaya Kobanî bilez bêra hewanayene û heqê kurdan û kêmnetewan destûr de bêrê garantîkerdene. Eynî wextî de waştbi ke heta ke nê gamî nêrê eştene, heme hetkarîyê ke YE dano Hukmatê Demkî bi nê şertî reyde bêrê girêdayene.
Seba peşnîyazanê parlamenteran rayî yenê dayene
Sey netîceyê kombîyayîş û munaqeşeyan, pêşnîyazê parlementeyan sey pêşnîyaznameyêk Parlementoyê Ewropayî rê ameyê pêşkêşkerdene. Pêşîyazname de yeno pêşnîyazkerdene ke hetkarîyê ke YE dano Hukmatê Demkî yê Sûrîye bi şertê qanûno bingeyînî de pawitişê heqanê kurd û kêmnetewanê Sûrîye, adirbest û aştîya domdare reyde bêrê girêdayene û her wina hetkarîyê merdimî seba Rojava bêrê erşawitene.
