Amed – Welatiyên Amedê têkildarî peyama Rêberê Gelê Kurd a bidîmen diyar kirin ku aliyê gelê Kurd her tiştî kir û divê piştî niha dewlet gavan biavêje.
Rêberê Gelê Kurd Abdullah Ocalan di 27ê Sibatê de banga “Aştî û Civaka Demokratîk” kir. Piştî bangê Partiya Karkerên Kurdistanê (PKK) 12ê Gulanê encamnameya kongereya xwe eşkere kir û ragihand ku xwe fesix kiriye. Îro jî Rêberê Gelê Kurd Abdullah Ocalan bang û peyamek bidîmên a dîrokî bi raya gitşî re hat parvekirin. Rêberê Gelê Kurd Abdullah Ocalan diyar dike ku pêvajo gihiştiye qonaxê nû û banga çekberdanê li gerîlayan kir. Welatiyên Amedê, peyama Rêberê Gelê Kurd Abdullah Ocalan ji Ajansa Welat re nirxandin.
‘Aştî yek alî nabe’
Welatiye bi navê Zekeriya Tanriverdî diyar kir ku ew ji aştiyê kêfxweş in û got: “Yên me gav diavêjin lê aliyên din hê jî tu gav neavêtiye. Ji bo girtiyên siyasî divê efû were derxistin. Gav bên avêtin jixwe pirsgirêk jî li holê namîne. Divê dewlet gavan biavêje, aştî yek alî nabe. Divê Serok azad bibe, bê Serok aştî nabe. Divê zimanê me jî azad bibe.”
‘Aştî were dê her tişt baş bibe’
Welatiya bi navê Ulfer Kalkan diyar kir ku wan her dem aştiyê xwestiye û wiha axivî: “Em naxwazin ciwan bên kuştin. Em şer naxwazin. Gerîla jî leşker jî bila neyên kuştin. Aştî were dê her tişt baş bibe. Me heta îro her tişt dît, malên me hatin şewitandin, ciwan hatin kuştin û bi pişt panzêran ve hatin kişandin. Êdî em wan tiştan naxwazin.”
‘Divê dewlet jî gavan biavêje’
Welatiyê bi navê Seyfettîn Sizlanan jî destnîşan kir ku aştî pêk were dê gelek baş bibe û kêfxweş bibin û wiha got: “Eger aştî were başbûn jî dê were. Wê xerabûn jî holê rabe. Divê her kes vî barî bide ser milê xwe. Ji bo aştî pêk were divê dewlet jî gavan biavêje.”
‘Baweriya me dewletê tune ye lê bi Abdullah Ocala heye’
Welatiyê bi nave Îlhamî Mutlu jî anî ziman ku divê her kes aştiyê bixwaze û wiha axivî: “Ji bo aştî pêk were gava sereke berdana girtiyên nexweş e. Îro kesên ku ji 30 salî zêdetir di girtîgehan de ne, hene. Behsa aştiyê tê kirin lê hê jî ew girtî ne. Baweriya me bi dewletê nayê lê baweriya me bi Abdullah Ocalan heye. PKKê xwe fesix kiriye lê îro bi hezaran kes hê jî di girtîgehan de ne. Gelek kes hê jî tên girtin. Divê qanûn werin guherandin.”
