Amed – Rêveberê Komeleya Ekolojiyê ya Amedê Necdet Sezgîn diyar kir ku desthilat dê dest bi vekirina maden û sondajên nû bike, îhale hatiye çêkirin û şîrket jî hatine amadekirin û got: “Ji bo em li dijî vekirina sondajan bisekinin, em xwe amade dikin.”
Wezirê Cavkaniyên Enerjî û Tabiyê Alparslan Bayraktar 29ê Cotmehê tev li bernameyekî bû û li wir diyar kiribû ku li Amedê dê li 4 qadan 24 sondajên nû ên petrolê bên vekirin û dest bi lêgerîna petrolê bikin. Li dijî biryara vekirina sondajan komele û saziyên ekolojiyê nerazîbûnên xwe tînin ziman. Rêveberê Komeleya Ekolojiyê ya Amedê Necdet Sezgîn têkildarî biryara wezaretê û talankirina xwezayê axivî.
‘Vekirina sondajên petrolê xwezayê talan dike’
Necdet Sezgîn diyar kir ku li tevahiya Kurdistanê plansaziya lêgerîna madenê heye û wiha got: “Serokkomarê Tirkiyeyê û Serokê Amerîkayê li ser lêgerîna madenê li hev kirin e. Ji bona wê her kes di nava tevgerê de ye û li benda herêmên nû ne ku dest bi lêgerîna madenê bikin. Ev plansazî demeke dirêje tê amadekirin. Em jî wekî sazî û dezgehên ekolojiyê di nava hevldanan de ne ku pêşiya vekirina maden û sondajan bigirin. Em jî li gund û navçeyên Amedê bi gel re ketin di nava tevgerê. Me cîvanan li dar xist û ji gel re behsa bandora neyînî ya madenan kir. Vekirina qadên maden û sondajan talankirinek mezin li xwezayê dike. Divê tevahî gel û saziyên ekolojiyê li dijî talankirina xwezayê bi hev re têbikoşin.”
‘Îhale hatine çêkirin û şîrket jî hatine amadekirin’
Necdet Sezgîn destnîşan kir ku li Herêma Bestayê, Çiyayê Cûdî, Zozanê Hesendînê ya li navçeya Pasûr û li hin deverên Licê hewldanên desthilatê hene û ev yek anîn ziman: “Em bi xelkê herêmê re civiyan û me qala talankirinê kir. Em li dijî talankirinê di nava tevgerê de ne. Gel jî dixwaze pêşî li lêgerîna madenê bigire. Em bi hev re nîqaş dikin ku çawa em dikarin pêşiyê lê bigirin. Îro li gelek herêman lêgerîna madenê didome û tê gotin ku dê gelek sondaj bên vekirin, ji bo vê yekê em hejmara tevahî sondaj û madenan nizanin. Lê em dizanin ku li her bajarek bakurê Kurdistanê hewldana desthilatê hene û dixwazin xwezayê talan bikin. Îhale hatiye çêkirin û şîrket jî hatine amadekirin. Em jî ji bo li dijî vekirina sondajan bisekinin xwe amade dikin.”
‘Di nava civak û xwezayê de aştî tunebe jiyan jî dê xera bibe’
Necdet Sezgîn bi bîr xist ku aştî ne tenê di nava mirovan de pêk tê û axaftina xwe wiha bi dawî kir: “Pêwist e ku jiyana tevahî zindiyan bê parastin. Dema ku aştî di navbera mirovan de hebe lê di navbera mirov û xwezayê de tunebe tu wateya aştiyê tune ye. Aştiya civakî girêdayî aştiya xwezayê ye. Şer li ku hebe em li dijî wê ne. Di nava civak û xwezayê de aştî tunebe jiyan jî dê xera bibe. Xerabiyên îro di cîhanê de tê kirin sedema wê şerê di navbera mirov û xwezayê de ye.”
