Mêrdîn – Li ser Ava Spî ya navçeya Nisêbînê ya Mêrdînê zarok li ribabê didin û geştiyar li ber dengê ribabê govendê digerînin.
Ribab ku yek ji hîmên bingehîn ê çand û folklora kurdî ya govendê ye bi sedan salane li ser hemû erdnîgariya Kurdistanê berdewam dike. Hê jî di şahiyên kurdan de û nexasim dema ku di şahiyê de daxwaza dîlan û govenda kurmancî hebe bê ribab govend germ nabe kelacana govendgêran nagihê lutkeya kêfxweşiyê. Di geşt û seyranên li ser Ava Spî ya navçeya Nisêbînê ya Mêrdînê ev kevneşopiya xweş a govenda li ber ribabê berdewam dike. Gelek geştiyar ne tenê ji bo geştê lê ji bo guhdarîkirin û govenda li ber dengê kemançeyên wan zarokên xweşik û jêhatî berê xwe didin ser Ava Spî û rojeke xweş derbas dikin.
